საქართველოს შეიარაღებულ ძალებსა და აფხაზ სეპარატისტებს შორის მდინარე გუმისთის სანაპიროზე მომხდარი ბრძოლიდან 33 წელი გავიდა. ამ დღესთან დაკავშირებით პარლამენტის თავდაცვისა და უსაფრთხოების კომიტეტის წევრებმა, თავდაცვის მინისტრის მოადგილემ გრიგოლ გიორგაძემ, ვეტერანების საქმეთა სახელმწიფო სამსახურის დირექტორმა კობა კობალაძემ, აფხაზეთის ავტონომიური რესპუბლიკის მთავრობისა და უმაღლესი საბჭოს წევრებმა და ვეტერანებმა, საქართველოს ტერიტორიული მთლიანობისთვის დაღუპულთა მემორიალი გვირგვინებით შეამკეს და სამშობლოს ერთიანობისთვის ბრძოლის ველზე დაცემულ მეომართა ხსოვნას პატივი მიაგეს, – ინფორმაციას საქართველოს პარლამენტი ავრცელებს.
„საქართველოს უახლეს ისტორიაში 16 მარტი ერთ-ერთი უმძიმესი დღეა. 33 წლის წინ, ამ დღეს, მდინარე გუმისთასთან სეპარატისტთა სამხედრო დაჯგუფებებთან უთანასწორო ბრძოლები გაიმართა. ჩვენმა ჯარისკაცებმა გმირობა და სიმამაცე, უპრეცედენტო თავგანწირვა გამოავლინეს. ბევრი მათგანი გმირულად შეეწირა საქართველოს ტერიტორიულ მთლიანობას და ქვეყნის დამოუკიდებლობის დაცვას. ამ ბრძოლაში განსაკუთრებით აღსანიშნავია ქართველი არტილერისტების სიმამაცე. რომ არა მათი გმირული ბრძოლა, ქართველი ჯარისკაცების მხრიდან მსხვერპლი კიდევ უფრო მეტი იქნებოდა.
ჩვენ არ ვივიწყებთ ქართველი ჯარისკაცების მამაცობას. გმირთა მემორიალზე ყოველი წლის 16 მარტს პატივს მივაგებთ და ქედს ვიხრით მათი გმირობის წინაშე“, – განაცხადა თავდაცვისა და უსაფრთხოების კომიტეტის თავმჯდომარემ ალექსანდრე ტაბატაძემ.