ნატოს მოკავშირეებმა ორშაბათს განაცხადეს, რომ ისინი არ ჩაერთვებიან დონალდ ტრამპის გეგმაში, რომელიც ირანის პორტების ბლოკირებას ითვალისწინებს. ინფორმაციას ამის შესახებ სააგენტო Reuters-ი ავრცელებს.
მათ ინიციატივა წამოაყენეს, რომ ინტერვენცია მხოლოდ საომარი მოქმედებების დასრულების შემდეგ განახორციელონ. ეს ნაბიჯი, სავარაუდოდ, გამოიწვევს ტრამპის უკმაყოფილებას და გაზრდის დაძაბულობას ალიანსის შიგნით.
ტრამპმა განაცხადა, რომ აშშ-ის სამხედრო ძალები გაანადგურებენ ნებისმიერ ირანულ გემს, რომელიც მიუახლოვდება ორშაბათს დაწყებულ ბლოკადას. ეს გადაწყვეტილება მას შემდეგ მიიღეს, რაც შაბათ-კვირას გამართული მოლაპარაკებები ირანთან ექვსკვირიანი კონფლიქტის დასრულების თაობაზე შეთანხმების გარეშე დასრულდა.
ტრამპმა თავდაპირველად განაცხადა, რომ აშშ სხვა ქვეყნებთან ერთად იმუშავებდა ჰორმუზის სრუტეში გამავალი გემების დასაბლოკად, თუმცა მოგვიანებით აშშ-ის სამხედრო უწყებამ დააზუსტა, რომ ბლოკადა მხოლოდ იმ გემებს შეეხებოდა, რომლებიც ირანის პორტებისკენ მიემართებოდნენ ან იქიდან გამოდიოდნენ.
ნატოს მოკავშირეებმა, მათ შორის ბრიტანეთმა და საფრანგეთმა, განაცხადეს, რომ ისინი არ ჩაებმებიან კონფლიქტში ბლოკადაში მონაწილეობის გზით; ამის ნაცვლად, მათ აღნიშნეს, რომ მუშაობენ ინიციატივაზე სრუტის გასახსნელად, რომელზეც, როგორც წესი, მსოფლიო ნავთობის მიწოდების მეხუთედი მოდის.
„ჩვენ არ ვუჭერთ მხარს ბლოკადას“, – განუცხადა ბრიტანეთის პრემიერ-მინისტრმა, კირ სტარმერმა BBC-ის.
„ჩემი გადაწყვეტილება ძალიან მკაფიოა: მიუხედავად იმისა, თუ რა ზეწოლა იქნება – და ეს ზეწოლა საკმაოდ სერიოზული იყო – ჩვენ არ ჩავერთვებით ომში“, – აღნიშნა მან.