აშშ-ის პრეზიდენტმა, დონალდ ტრამპმა 13 აპრილს თეთრ სახლში ნიდერლანდების მეფე ვილემ-ალექსანდრესთან და დედოფალ მაქსიმასთან შეხვედრაზე განაცხადა, რომ ირანში ომის დასრულება რაც შეიძლება სწრაფად სურს. ინფორმაციას The Wall Street Journal-ი ავრცელებს.
თუმცა, როგორც აღნიშნა ტრამპმა, ერთადერთი საშუალება, რომელიც ირანს მოლაპარაკებების მაგიდასთან დასვამს, ზეწოლის გაძლიერებაა.
როგორც გამოცემა იუწყება, მიუხედავად იმისა, რომ ტრამპმა რამდენიმე დღის წინ განაცხადა, რომ ჰორმუზის სრუტის ბლოკადაში „სხვა ქვეყნებიც“ მიიღებენ მონაწილეობას, დღემდე სახელმწიფოების სია არ გამოქვეყნებულა.
„ბლოკადა უმწიკვლოდ და სხვა ქვეყნების დახმარების გარეშე ხორციელდება, იმიტომ რომ ჩვენ მსოფლიოში უძლიერესი ფლოტი გვყავს, ხოლო ირანის ფლოტი ზღვის ფსკერზეა“, – ციტირებს გამოცემა თეთრი სახლის პრესმდივანს კეროლაინ ლევიტს.
The Wall Street Journal-ის ინფორმაციით, ტრამპი სთხოვს ირანს, რომ გამდიდრებული ურანი აშშ-ს გადასცეს და გამდიდრების პროცესი სულ მცირე 20 წლით შეაჩეროს. თეირანი, თავის მხრივ, ვაშინგტონს ხუთწლიან ვადას სთავაზობს და სურს, რომ უკვე გამდიდრებული ურანი ქვეყანაში დარჩეს.