2026 წლის იანვარი-მარტის მონაცემებით, ტურისტული ვიზიტების ზრდასთან ერთად, გაზრდილია მოგზაურობიდან მიღებული შემოსავლები და რეკორდულ მაჩვენებელს, 829.8 მილიონ აშშ. დოლარს შეადგენს.
საქართველოს ეკონომიკისა და მდგრადი განვითარების სამინისტროს ტურიზმის ეროვნული ადმინისტრაციის ხელმძღვანელის, მაია ომიაძის შეფასებით, პოზიტიური დინამიკა განსაკუთრებით თვალსაჩინოა სტრატეგიული ბაზრებიდან მიღებული შემოსავლების ზრდაში.
„2026 წლის პირველი კვარტლის მონაცემებით, ტურიზმიდან შემოსავლების რეკორდული მაჩვენებელი დაფიქსირდა. ანალოგიურ პერიოდთან შედარებით 0,5%-ით არის გაზრდილი და 830 მილიონი ამერიკული დოლარი შეადგინა. აღსანიშნავია, რომ განსაკუთრებით გაზრდილია შემოსავლები ევროკავშირის ქვეყნებიდან, დიდი ბრიტანეთიდან, ასევე თურქეთიდან და საუდის არაბეთიდან.
ხაზგასასმელია ის ფაქტი, რომ სწორად დაგეგმილი მარკეტინგული კამპანიებით, აქტივობებითა და, რა თქმა უნდა, ავიაციის სექტორთან ერთობლივად მუშაობის შედეგად, ჩვენი სტრატეგიული ბაზრებიდან კვარტლიდან კვარტლამდე და წლიდან წლამდე იზრდება საერთაშორისო მოგზაურების თუ ტურისტების ვიზიტების ოდენობა და ეს ყველაფერი, ასევე, შემოსავლებზეც აისახება”, – აღნიშნა მაია ომიაძემ.
2026 წლის I კვარტლის მონაცემებით, მნიშვნელოვნად გაიზარდა ტურიზმიდან მიღებული შემოსავლები ევროკავშირიდან და დიდი ბრიტანეთიდან (36.4%-ით), თურქეთიდან (12.2%-ით) და საუდის არაბეთიდან (47.6%-ით).