კოულ ტომას ალენს ბრალი ოფიციალურად წარუდგინეს. ალენს ბრალი სამი მუხლით წარედგინა. ესენია – ამერიკის შეერთებული შტატების პრეზიდენტის მკვლელობის მცდელობა, ძალადობრივი დანაშაულის ჩადენისას ცეცხლსასროლი იარაღის გამოყენება, მძიმე დანაშაულის ჩადენის მიზნით შტატებს შორის ცეცხლსასროლი იარაღის უკანონო გადატანა.
ალენი თუ დამნაშავედ ცნეს აშშ-ის პრეზიდენტის მკვლელობის მცდელობის მუხლით, მას, შესაძლოა, სამუდამო პატიმრობა მიესაჯოს.
ფედერალურმა პროკურორმა, ჯოსლინ ბალანტინიმ განაცხადა, რომ ალენმა აშშ-ის პრეზიდენტის მკვლელობის მცდელობის გამო რამდენიმე შტატის საზღვარი გადაკვეთა.
თავად კოულ ტომას ალენი ბრალს არ აღიარებს.
ალენი ამ დროისთვის პატიმრობაში რჩება. მისი წინასწარი პატიმრობის საკითხზე სასამართლო სხდომა ხუთშაბათს გაიმართება, ხოლო წინასწარი მოსმენა 11 მაისს არის ჩანიშნული.
შეგახსენებთ, აშშ-ში, თეთრი სახლის კორესპონდენტების ასოციაციის მიღებაზე, რომელსაც დონალდ ტრამპი ესწრებოდა, სროლა იყო. სროლაში ეჭვმიტანილი პირი 31 წლის კოულ ტომას ალენია. სოციალურ ქსელებში გამოქვეყნებული მასალებიდან ირკვევა, რომ ის ლოს ანჯელესის მახლობლად, კალიფორნიის შტატის ქალაქ ტორენსში მასწავლებელი იყო. გავრცელებული ინფორმაციით, თავდასხმამდე რამდენიმე წუთით ადრე მან ოჯახს ელექტრონული ფოსტით მანიფესტი გაუგზავნა, სადაც ტრამპის ადმინისტრაციის წევრები სამიზნეებად დაასახელა.