ისრაელის საგარეო საქმეთა მინისტრი გიდეონ საარი უკრაინის საგარეო საქმეთა მინისტრის, ანდრეი სიბიგას განცხადებას ეხმაურება, რომელმაც აღნიშნა, რომ უკრაინის საგარეო საქმეთა სამინისტროში საპროტესტო ნოტის გადასაცემად ისრაელის ელჩი დაიბარეს.
გიდეონ საარი აცხადებს, რომ ისრაელის ხელისუფლება კანონის შესაბამისად იმოქმედებს.
საარის თქმით, ამ ეტაპზე ისრაელის მხარეს არ მიუღია მტკიცებულებები, რომლებიც უკრაინის ბრალდებებს დაადასტურებდა.
„დიპლომატიური ურთიერთობები, განსაკუთრებით მეგობარ ერებს შორის, არ წარიმართება „ტვიტერზე“ ან მედიაში. ბრალდებები არ არის მტკიცებულება. ბრალდებების დამადასტურებელი მტკიცებულებები ჯერ არ არის წარმოდგენილი. თქვენ არც კი წარადგინეთ სამართლებრივი დახმარების მოთხოვნა, ვიდრე მედიასა და სოციალურ ქსელებს მიმართავდით. საკითხი შესწავლილი იქნება“, – წერს საარი.
ისრაელის საგარეო საქმეთა მინისტრის თქმით, ისრაელი კანონის უზენაესობას იცავს დამოუკიდებელი სამართალდამცავი ორგანოებით და „ისრაელის ყველა უწყება იმოქმედებს კანონის შესაბამისად“.
ცნობისთვის, უკრაინის საგარეო საქმეთა მინისტრმა, ანდრეი სიბიგამ სოციალურ ქსელში დაწერა, რომ უკრაინის საგარეო საქმეთა სამინისტროში ისრაელის ელჩი დაიბარეს, რათა საპროტესტო ნოტა გადასცენ იმ გემთან დაკავშირებით, რომელსაც ოკუპირებული ტერიტორიებიდან რუსეთის მიერ მოპარული უკრაინული მარცვლეული გადაჰქონდა.