ირანში ხელისუფლება ისლამური რევოლუციის გუშაგთა კორპუსმა ჩაიგდო ხელში. ინფორმაციას Reuters-ი ავრცელებს.
სააგენტოს ცნობით, მას შემდეგ, რაც ამერიკელებმა და ისრაელმა ირანის უზენაესი ლიდერი, აიათოლა ალი ხამენეი მოკლეს, ქვეყანაში რეალური ძალაუფლება ისლამური რევოლუციის გუშაგთა კორპუსის ხელში გადავიდა.
„ომის პირველ დღეს აიათოლა ალი ხამენეის მკვლელობის და მისი შვილის, მოჯთაბას დანიშვნის შემდეგ ახალი სისტემა შეიქმნა, რომელშიც ისლამური რევოლუციის გუშაგთა კორპუსის მეთაურები დომინირებენ, ხოლო გადაწყვეტილებების მიმღები ცენტრი აღარ არსებობს“, – წერს გამოცემა.
როგორც Reuters-ი იუწყება, მოჯთაბა ხამენეი ფორმალურად სისტემის მეთაურია, მაგრამ მისი როლი გენერლების გადაწყვეტილებების ლეგიტიმაციით შემოიფარგლება.
ომის წნეხის გამო ძალაუფლება ვიწრო და მკაცრს წრეში აღმოჩნდა, რომელიც ეროვნული უსაფრთხოების უმაღლესი საბჭოს, უზენაესი ლიდერის აპარატისა და გუშაგთა კორპუსით შემოიფარგლება, აღნიშნავს გამოცემა.
Reuters-ის ცნობით, ისლამური რევოლუციის გუშაგთა კორპუსი ახლა აკონტროლებს როგორც სამხედრო სტრატეგიას, ისე საკვანძო პოლიტიკურ გადაწყვეტილებებს.
გარდა ამისა, როგორც სააგენტო წერს, მოლაპარაკებებზე ირანის მკაცრი პოზიცია განპირობებულია არა იმდენად თეირანის სიმკაცრით, არამედ ხელისუფლების დეცენტრალიზაციით. როგორც ანალიტიკოსები აღნიშნავენ, გარიგების დადების მთავარ პრობლემას წარმოადგენს არა თეირანში გამართული შიდა პოლიტიკური ბრძოლა, არამედ ის, თუ რის შეთავაზება შეუძლია ვაშინგტონს და რის მიღება – რევოლუციის გუშაგთა კორპუსს.
აშშ-თან მოლაპარაკებებში ირანის დიპლომატიის სახეს საგარეო საქმეთა მინისტრი, აბას არაღჩი წარმოადგენს. მოგვიანებით მას ირანის პარლამენტის სპიკერი, მოჰამად ბაღერ ღალიბაფი შეუერთდა. თუმცა, რეალურად, საკვანძო ფიგურა ისლამური რევოლუციის გუშაგთა კორპუსის მეთაური, აჰმად ვაჰიდი არის.