ოპოზიციურ ალიანსში დამოუკიდებელ გადაწყვეტილებებს ვერ იღებენ, გადაწყვეტილებას, ალიანსში ვინ იქნება და რატომ, მათი პატრონები იღებენ, – ამის შესახებ „ქართული ოცნების“ წევრმა, თენგიზ შარმანაშვილმა საქართველოს პირველ არხს განუცხადა.
შარმანაშვილის თქმით, ისინი თუ მოიფიქრებენ, რომ „ლელო“ და გახარიას პარტია ალიანსში უნდა გადავიდნენ, ასე მოხდება, რადგან მათ საკუთარი ნება არ აქვთ.
„ამ პროცესს იმ თვალსაზისით ნუ შეხედავთ, რომ აქ შიდა პროცესი მიმდინარეობს და თავად წყვეტენ, ვინ სად გაერთიანდეს. სამწუხარო ფაქტია, რომ ეს ხალხი ერთი პატრონისგან იმართება. როლები გადანაწილებულია. როლები გადანაწილებული იყო არჩევნებამდეც, ვის უნდა მიეღო მონაწილეობა და ვის – არა. ეს ხალხი ერთ ნარატივს ემსახურება. პროპაგანდისტული მედია ის არის, რაც მათ აქვთ და ამ მედიებში ფართოდ უხსნიან გზას იმ პარტიებს, რომელთაც ოპონირებას უწევენ? არ დაიჯეროთ, რომ კავშირში არ არიან. უბრალოდ, მათი დავალებაა, როლები გადაინაწილონ“, – განაცხადა თენგიზ შარმანაშვილმა.