მთავრობის ახალ ინიციატივასთან დაკავშირებით საუბრისას, რომელიც სპეციალური სამმართველოს შექმნას გულისხმობს, რომლის ძირითადი ფუნქცია საჯარო სივრცეში სიძულვილის ენის, შეურაცხმყოფელი კამპანიებისა და აგრესიული კომუნიკაციის სისტემური მონიტორინგი და შესაბამისი სამართლებრივი რეაგირება იქნება, პოლიტიკოს ნიკა ობოლაძე აცხადებს, რომ ქვეყანაში პოლარიზაცია და ზიზღის ენა რეალურად დიდი პრობლემაა. ამის შესახებ მან “რუსთავი 2”-ის ეთერში გადაცემაში “დებატები” ისაუბრა.
ნიკა ობოლაძის თქმით, ქვეყანაში არიან როგორც “ქართლი ოცნების”, ისე ოპოზიციის ამომრჩეველი მოქალაქეები და არცერთი მხარე იმსახურებს, რომ მათი პოლიტიკური პოზიციის გამო მოღალატე ან ჯაშუში ეძახონ.
“ვფიქრობ, რომ დღეს პრობლემაა ამ ქვეყანაში პოლარიზაცია და ზიზღის ენა. მე მართლა მინდა, რომ ეს პრობლემა მოგვარდეს და ვიყო ძალიან კონსტრუქციული.
საქართველოში გვყავს ერთი მილიონი ადამიანი, რომელიც წავიდა 2024 წელს არჩევნებზე, გააფერადა 41 და ეს ერთი მილიონი ადამიანი არ არის რუსი, ეს ერთი მილიონი ადამიანი არ არის მონა, ამ ერთი მილიონი ადამიანიდან დიდ უმრავლესობას უყვარს საქართველო და იმის თქმა თუნდაც, რომ ის ერთი მილიონი ადამიანი ხმას აძლევს ქვეყნის გარუსებას ან გაყიდვას, მე მგონია არასწორი. ეს არის ჩემი პოზიცია.
ჩვენ გვყავს დაახლოებით ერთი მილიონი ადამიანი, რომელსაც ძალიან უყვარს საქართველო, იმდენად უყვარს, რომ შეიძლება გაზიც გადაყლაპა, შეიძლება იჩხუბა, შეიძლება ყველაფერი ქნა, აპროტესტა, ხმა მისცა “ქართული ოცნების” წინააღმდეგ, მაგრამ უყვარს საქართველო და ევროპაში ეს ადამიანები ხედავდნენ საქართველოს იდენტობის შენარჩუნების და განვითარების გზას და ის, რომ ეს ერთი მილიონი ადამიანი, ვინც ოპოზიციას აძლევს ხმას, ხმას აძლევს აგენტებს, უსამშობლოებს, მოღალატეებს, ომის მსურველებს, არის ტყუილი.
იმ ხალხმა, ვინც ოპოზიციას მისცა ხმა, არავის არ უნდოდა ომის დაწყება, ისევე როგორც ის ხალხი, ვინც “ქართულ ოცნებას” აძლევს ხმას, უმეტესობა მათგანი არის პატრიოტი.
უნდა შევთანხმდეთ იმაზე, რომ ასე ყველაფრის ძახილი არ არის სწორი და ეგრე არ არის, რომ მხოლოდ ცალმხრივია პასუხისმგებლობა. კი, ორმხირივი არის პასუხისმგებლობა, მაგრამ როდესაც 14 წელია ხარ ხელისუფლებაში, შენი პასუხისმგებლობაა დიდი”, – აცხადებს ნიკა ობოლაძე.