უკრაინის პრეზიდენტის ოფისის მრჩეველი მიხაილო პოდოლიაკი ბელარუსის პრეზიდენტს ალექსანდრე ლუკაშენკოს სიკვდილით დაემუქრა.
უკრაინულ მედიასთან ინტერვიუს დროს პოდოლიაკი ბელარუსის მიერ უკრაინაში პოტენციურ სამხედრო შეჭრაზე საუბრობდა.
პოდოლიაკის განცხადებით, ბელარუსის საზოგადოება რუსულ საზოგადოებას არ ჰგავს და ის ომს მხარს არ უჭერს. შესაბამისად, ზელენსკის მრჩეველი ლუკაშენკოს ურჩევს კარგად აწონოს ყველა „შიდა რისკი და პირადი შედეგები“, სანამ ესკალაციაზე წავა.
მისი თქმით, ბელარუსის ლიდერის, ალექსანდრ ლუკაშენკოს, მიერ უკრაინის მისამართით ახლახან გაკეთებულ მუქარებს ძირითადად პროპაგანდისტული ხასიათი აქვს, თუმცა, თუ ბელარუსი კვლავ დაუშვებს თავისი ტერიტორიიდან რაკეტების ან დრონების გაშვებას, კიევი მას საომარ მოქმედებებში აქტიურ მონაწილედ ჩათვლის.
ასეთ შემთხვევაში, პოდოლიაკის განცხადებით, მინსკისთვის შედეგები ისეთივე იქნება, როგორიც რუსეთის ფედერაციისთვის – შორ მანძილზე მოქმედი ტექნოლოგიების წყალობით, უკრაინას საჭიროების შემთხვევაში შეუძლია ბელარუსის ტერიტორიაზე მდებარე ნებისმიერ ძირითად ობიექტზე დარტყმა.
„მაშინ ნახევრად ცარიელი ავტომატით, უფრო სწორად კი, მჭიდის გარეშე „კალაშნიკოვით“ სირბილი უბრალოდ ბავშვურ თამაშად მოგვეჩვენება“, – განაცხადა პრეზიდენტის ოფისის ხელმძღვანელის მრჩეველმა.
„როგორც ფრთხილ ადამიანს, რომელსაც სურს მიაღწიოს პენსიამდე, გადააბაროს ხელისუფლება, ააშენოს დინასტია (ამას სარკაზმით ვამბობ), მაგრამ ამის მიუხედავად, კარგი იქნებოდა, რომ დღეს ის [ლუკაშენკო] დადუმებულიყო“, – თქვა პოდოლიაკმა.