გაფართოების საკითხებში ევროკომისარმა უკრაინის პარლამენტი გააფრთხილა, რომ სასამართლო რეფორმების გარეშე ქვეყანა ასობით მილიონ ევროს დაკარგავს. ამის შესახებ მარტა კოსმა კიევში ჟურნალისტებთან საუბრისას განაცხადა.
ევროკომისარმა განმარტა, რომ საუბარი შეეხება ერთ-ერთ რეფორმას, რომელიც გათვალისწინებულია Ukraine Facility-ს ფარგლებში. ამ რეფორმის შეუსრულებლობის შემთხვევაში უკრაინამ, შესაძლოა, ევროკავშირისგან მნიშვნელოვანი საგრანტო დაფინანსება დაკარგოს.
„დღეს პარლამენტში ჩემს კოლეგებს პირდაპირ ვუთხარი, რომ იმ სისტემის მიხედვით, რომლითაც ვმუშაობთ, რეფორმების განსახორციელებლად გამოყოფილი შეღავათიანი პერიოდი მალე დასრულდება“, – განაცხადა კოსმა.
მისი თქმით, საუბარია მოსამართლეთა კეთილსინდისიერების დეკლარაციების შემოწმების წესების შეცვლაზე.
„თუ მოსამართლეთა კეთილსინდისიერების დეკლარაციებთან დაკავშირებული რეფორმა სექტემბრის ბოლომდე არ განხორციელდება, უკრაინა რამდენიმე ასეულ მილიონ ევროს დაკარგავს. ეს თანხა უბრალოდ დაიკარგება და მისი გადარიცხვა ვეღარ მოხდება. მე ეს პირდაპირ ვუთხარი თქვენს პარლამენტარებს. მესმის, რამდენად რთულია რეფორმების გატარება, მაგრამ ჩვენც გვაქვს საკუთარი წესები. ევროკავშირის ქვეყნები გადასახადის გადამხდელთა ფულს გამოყოფენ და ვალდებულები ვართ, ავხსნათ, როგორ იხარჯება ეს თანხები“, – აღნიშნა მან.
მარტა კოსმა იმედი გამოთქვა, რომ უკრაინა საჭირო ცვლილებებს დროულად განახორციელებს და დაფინანსების დაკარგვა არ მოხდება.
პროგრამა Ukraine Facility რეფორმების შესრულების სანაცვლოდ ფინანსურ დახმარებას ითვალისწინებს. ამჟამად უკრაინას ორი ყველაზე დაგვიანებული ვალდებულება აქვს: ანტიკორუფციული სასამართლოს გაძლიერება და მოსამართლეთა კეთილსინდისიერების დეკლარაციების სისტემის რეფორმირება. თითოეული ამ ცვლილების განხორციელება უკრაინის ბიუჯეტს დაახლოებით 300 მილიონი ევროს ოდენობის საგრანტო დაფინანსებას მოუტანს.