ჯო უილსონის მხრიდან არასერიოზული განცხადებების კიდევ ერთი რაუნდი მოვისმინეთ. ამ შემთხვევაში რა ამოძრავებს, ვერ გეტყვით, მაგრამ წარსულის გამოცდილებით თუ ვიხელმძღვანელებთ, ალბათ, ამერიკულ FARA-ში ლობისტურ ხელშეკრულებას ვიხილავთ, რის ფარგლებშიც ის დაინტერესებულია, საქართველოს წინააღმდეგ გამორჩეულად ანტისახელმწიფოებრივი განცხადებები გააკეთოს, – ამის შესახებ პარლამენტის ევროინტეგრაციის კომიტეტის თავმჯდომარე ლევან მახაშვილმა საქართველოს პირველ არხს განუცხადა.
მისივე თქმით, „ქვეყნის წინააღმდეგ შეტევის ახალი რაუნდი ალბათ რაღაც ლობისტური საქმიანობის შედეგია“.
„დარწმუნებული ვარ, კონგრესში 99 პროცენტმა არც კი იცის, საქართველო სად არის ან რაზეა დოკუმენტში საუბარი. როგორც წესი, კოლეგიალურად ხდება ნდობის საფუძველზე ერთმანეთის მხარდაჭერა. ამ პაკეტური შეთანხმების ნაწილია ეს პროცესი. წინა გამოცდილება აჩვენებს, რომ, როგორც წესი, ამ ადამიანს ლობისტური შეთანხმებები ამოძრავებს“, – განაცხადა ლევან მახაშვილმა.
ცნობისთვის, აშშ-ის წარმომადგენელთა პალატამ მიიღო „კავკასიაში ჩინეთის კონტროლის წინააღმდეგ ბრძოლის აქტი“, რომლითაც „საქართველოში რუსულ და ჩინურ სადაზვერვო საქმიანობაზე“ საიდუმლო ანგარიშის მომზადებას ითხოვს.
კანონპროექტის მიღებამდე წარმომადგენელთა პალატაში სიტყვით გამოვიდა რესპუბლიკელი კონგრესმენი ჯო უილსონი, რომელმაც განაცხადა: „არალეგიტიმური „ქართული ოცნების“ რეჟიმი ამჟამად ქვეყნის ჩინეთის კომუნისტური პარტიისთვის და ომის დამნაშავე პუტინისთვის და ირანისთვის მიყიდვის პროცესშია, რაც ეწინააღმდეგება ქართველი ხალხის ნებას და ამერიკის შეერთებული შტატების ინტერესებს“.