ეკონომიკისა და მდგრადი განვითარების მინისტრის მარიამ ქვრივიშვილის განცხადებით, ყაზახეთის რესპუბლიკაში საქართველოს სამთავრობო დელეგაციის ვიზიტის მიმდინარეობისას არაერთი მნიშვნელოვანი ორმხრივი, მაღალი რანგის შეხვედრა გაიმართა.
მისივე თქმით, მხარეებმა ქვეყნებს შორის სავაჭრო-ეკონომიკური კავშირების გაღრმავების პერსპექტივებზე ისაუბრეს.
„ვისაუბრეთ ენერგეტიკის სექტორში არსებულ საინვესტიციო შესაძლებლობებზე, ასევე სხვა შესაძლებლობებზე, რომლებიც კიდევ უფრო მეტად გაამყარებს ორ ქვეყანას შორის არსებულ სავაჭრო-ეკონომიკურ ურთიერთობებს. მნიშვნელოვანია, რომ ვიზიტის ფარგლებში ხელი მოვაწერეთ რამდენიმე შეთანხმებას, რომლებიც გულისხმობს მათ შორის ტურიზმის, ისევე როგორც საინფორმაციო ტექნოლოგიების სფეროებში ურთიერთობების გაღრმავებას“, – აღნიშნა ეკონომიკის მინისტრმა.
მარიამ ქვრივიშვილის განცახდებით, ყაზახეთი საქართველოსთვის გამორჩეულად მზარდი ტურისტული ქვეყანაა, საიდანაც ყოველწლიურად იზრდება ტურისტული ნაკადი. ამასთან, ასევე მზარდი დინამიკით ხასიათდება ორ ქვეყანას შორის პირდაპირი ფრენები საქართველოს სამივე საერთაშორისო აეროპორტში.
„მზარდი პირდაპირი ფრენების კვალდაკვალ ჩვენ ვხედავთ, რომ ყოველწლიურად იზრდება ტურისტული ნაკადი, რაც, რა თქმა უნდა, დადებითად აისახება ჩვენი ქვეყნის ეკონომიკაზე, ტურიზმის სექტორზე და ხელს უწყობს აღნიშნულ სექტორში დასაქმებული მცირე და საშუალო მეწარმეების გაძლიერებას“, განაცხადა ეკონომიკის მინისტრმა.