იტალიის ქალაქ ბოლონიაში პოლიციასა და მომიტინგეებს შორის დაპირისპირება მოხდა. აქტივისტები პოლიციის მხრიდან მამაკაცის დაკავების დროს გამოყენებულ ძალადობას აპროტესტებდნენ, რა დროსაც ის ადგილზე დაიღუპა.
დემონსტრანტებმა ბოლონიაში მსვლელობა მოაწყვეს და მოგვიანებით ქალაქის ცენტრში შეიკრიბნენ, სადაც გარდაცვლილის დისშვილმა, იოსრა ფაკირმა ხალხს სიტყვით მიმართა.
„ჩვენ გავაგრძელებთ მისთვის და ჩვენი ოჯახისთვის სიმართლის მოთხოვნას, რათა სხვას აღარასოდეს მოუწიოს იმის გავლა, რაც მან გადაიტანა. ჩვენ აქ ვართ სიმართლისა და სამართლიანობის სათხოვნელად“, – განაცხადა იოსრა ფაკირმა.
მოგვიანებით დემონსტრანტებსა და სპეცრაზმს შორის შეტაკება მოხდა. პოლიციამ მომიტინგეების წინააღმდეგ წყლის ჭავლი და ცრემლსადენი გაზი გამოიყენა.
იტალიური მედიის ცნობით, მაროკოში დაბადებული მეწარმე (ანტერპრენერი) აბდერაჰიმ ფაკირი, რომელიც მცირე გადაზიდვებისა და დასუფთავების ბიზნესს ფლობდა, აგრესიულად იქცეოდა და ავტoმობილის დაზიანებას ცდილობდა, რა დროსაც პოლიცია გამოიძახეს.
ინციდენტის ამსახველმა კადრებმა, რომლებიც ერთ-ერთმა მოქალაქემ გადაიღო და ინტერნეტში ფართოდ გავრცელდა, ასობით ადამიანის გაბრაზება და ქუჩაში გამოსვლა გამოიწვია. უფრო კონკრეტულად კი, კადრებში ჩანს, როგორ წევს ფაკირი მიწაზე, ვიდრე ორი ოფიცერი მას აკავებს. ვიდეოში ისმის, თუ როგორ ითხოვს ის დახმარებას და აცხადებს, რომ სუნთქვა უჭირს.