იემენელმა „ჰუსიტებმა“ წითელ ზღვაში საუდის არაბეთის ორ ნავთობტანკერზე თავდასხმა განახორციელეს. ინფორმაციას „როიტერი“ ავრცელებს.
მედიის ცნობით, „ჰუსიტებმა“ საუდის არაბეთის ორ ნავთობტანკერს – Encelia-სა და Layla-ს დრონებისა და რაკეტების გამოყენებით შეუტიეს.
საუდის არაბეთის სახელმწიფო საინფორმაციო სააგენტომ დაადასტურა, რომ ნავთობტანკერ Encelia-ს დარტყმა მართლაც მიაყენეს, თუმცა,Layla-ზე თავდასხმის ფაქტი ამ დრომდე დაუდასტურებელი რჩება.
როგორც „როიტერი“ წერს, ირანის მიერ ჰორმუზის სრუტის ჩაკეტვისა და „ჰუსიტების“ მიერ წითელ ზღვაში საუდის არაბეთის ტანკერებზე თავდასხმის შედეგად საფრთხე შეექმნა ნავთობის ალტერნატიულ საზღვაო მარშრუტს და გლობალურ ენერგომომარაგებას. გავრცელებული ინფორმაციით, თავდასხმები ხორციელდება რეგიონული დაპირისპირების ფონზე. „როიტერის“ ცნობით, საუდის არაბეთის პორტებთან ტანკერების დაზიანება და აშშ-ის საპასუხო დარტყმები ირანზე მსოფლიო ბაზარზე ნავთობის ფასების ზრდას იწვევს.
მას შემდეგ, რაც იემენელმა „ჰუსიტებმა“ საუდის არაბეთის წინააღმდეგ საზღვაო ბლოკადა გამოაცხადეს, ხუთმა ნავთობტანკერმა ბაბ-ელ-მანდების სრუტის გვერდის ავლის მიზნით წითელ ზღვაში კურსი შეიცვალა, ხოლო ნავთობით დატვირთულმა საუდის არაბეთის სამმა ტანკერმა, რომელიც ჩინეთისა და ინდოეთის მიმართულებით მიდიოდნენ, სამშაბათს კურსი შეცვალა და უკან გაბრუნდა.