აშშ-ის სახელმწიფო მდივანმა, მარკო რუბიომ მანილაში ჟურნალისტებთან საუბრისას განაცხადა, რომ პრეზიდენტ დონალდ ტრამპს უკრაინაში მიმდინარე ომი „სულელურ და უაზრო ომად“ მიაჩნია და შეერთებული შტატები მზად არის, ნებისმიერი პოზიტიური როლი შეასრულოს მის დასასრულებლად.
„ჩვენ გვინდა სამშვიდობო შეთანხმება. გვინდა, რომ ომი დასრულდეს. მზად ვართ, შევასრულოთ ნებისმიერი პოზიტიური როლი, რომელიც ხელს შეუწყობს ომის დასრულებას. მაგრამ ამისთვის აუცილებელია ისეთი შეთანხმება, რომელსაც როგორც რუსეთი, ისე უკრაინა დათანხმდება. ეს პრესკონფერენციაზე არ მოხდება, არც ფილიპინებში გამართული ერთი შეხვედრის ფარგლებში. ამას დიდი სამუშაო სჭირდება.
წარსულშიც ვცადეთ შუამავლობა, თუმცა იმ ეტაპზე ეს შედეგიანი არ აღმოჩნდა. თუ ახლა გარემოებები შეიცვალა და შეთანხმების შესაძლებლობა გაჩნდა, ჩვენ მზად ვართ. აშშ-ის პრეზიდენტი ამ მიზნის ერთგულია და ყოველდღე, როცა ვხედავთ შესაძლებლობას, ვითამაშოთ პოზიტიური როლი, ამას გავაკეთებთ.
საბოლოოდ, პრეზიდენტისთვის ყველაზე მნიშვნელოვანია, რომ ადამიანები აღარ იღუპებოდნენ, აღარ ხდებოდეს მათი მკვლელობა, უკრაინამ მშვიდობიანად შეძლოს ცხოვრება, უკრაინელებმა საკუთარ ქვეყანაში დაბრუნება და მისი აღდგენა შეძლონ, ხოლო ახალგაზრდა რუსები აღარ იღუპებოდნენ ბრძოლის ველზე, კვირაში დაახლოებით 5 000 ადამიანი.
ტრამპს მიაჩნია, რომ ეს სულელური ომია. მიაჩნია, რომ ეს უაზრო ომია. თუ მისი დასრულებისთვის რამის გაკეთება შეგვიძლია, შეერთებული შტატები გამოიყენებს საკუთარ ძალასა და გავლენას. ამისთვის მზად ვართ, თუ შესაბამისი შესაძლებლობა გაჩნდება. იმედი მაქვს, ასეთი შესაძლებლობა იქნება. სწორედ ეს გზავნილი თანმიმდევრულად გადავეცით ორივე მხარეს“, – განაცხადა აშშ-ის სახელმწიფო მდივანმა.
ამასთან, რუბიოს თქმით, უკრაინაში ომის დასრულების მიზნით მიმდინარე მოლაპარაკებების ჩიხიდან გამოსასვლელად აუცილებელი იქნება ახალი იდეებისა და ახალი მიდგომების შეთავაზება.
„აქამდე წარმოდგენილი წინადადებები იმ დროს უკრაინისთვის მიუღებელი იყო და ვფიქრობ, ახლაც მიუღებელი იქნებოდა. შესაძლოა, კიდევ უფრო მეტადაც. თუ მშვიდობა ოდესმე დამყარდება, ეს მოხდება ახალი იდეებისა და ახალი კონცეფციების საფუძველზე. თუ შესაბამისი პირობები შეიქმნება, მზად ვართ, საჭირო ფორმატში სწორედ ასეთი წინადადებები შევთავაზოთ მხარეებს და კონსტრუქციული როლი შევასრულოთ“, – აღნიშნა რუბიომ.
მისივე განცხადებით, აშშ გააგრძელებს მცდელობას, იპოვოს კომპრომისი.
„რუსეთის ტერიტორიის სიღრმეშიც უკვე ხორციელდება დარტყმები. ასეთ რამეს წინა წლის ბოლოს ვერ ვხედავდით. წინ კიდევ ზამთარია და უკრაინას საკუთარი საჰაერო სივრცის დაცვა მოუწევს. უკრაინამაც უზარმაზარი ფასი გადაიხადა. ვნახეთ მშვიდობიანი მოსახლეობის დაღუპვა, კიევზე თავდასხმები. ეს ომი არც უკრაინისთვის ყოფილა კარგი. ამიტომ, ვფიქრობ, ორივე მხარეს უნდა ჰქონდეს მოტივაცია, დაასრულოს ეს ომი.
მთავარი გამოწვევა ისეთი გამოსავლის პოვნაა, რომელიც ორივე მხარისთვის მისაღები იქნება. ჩვენ ეს ვცადეთ და კვლავაც გავაგრძელებთ მცდელობას, ვიპოვოთ საერთო საფუძველი, რომელიც ომის დასრულებას შესაძლებელს გახდის. თუ ამის შესაძლებლობა გაჩნდება, შეერთებული შტატები მზად არის, ამ პროცესში პოზიტიური როლი შეასრულოს. ეს დღესაც ვთქვით და წარსულშიც არაერთხელ განგვიცხადებია“, – განაცხადა რუბიომ.