ვოლოდიმირ ზელენსკიმ განაცხადა, რომ ირანი და ჩრდილოეთ კორეა უკვე დაესხნენ თავს უკრაინას რუსეთისთვის იარაღის, სამხედრო ტექნოლოგიებისა და ჯარისკაცების მიწოდებით. ამ თემაზე უკრაინის პრეზიდენტმა Sky News-თან ინტერვიუში ისაუბრა.
„ჩვენ სიფრთხილე გმართებს. ყველაფერი უნდა გავაკეთოთ, რათა არავითარ შემთხვევაში არ გავხსნათ ახალი ფრონტი. მაგრამ გულწრფელები უნდა ვიყოთ. ირანელები და ჩრდილოეთკორეელები უკვე დაგვესხნენ თავს. იმედი მაქვს, რომ ისინი ამ თავდასხმებს არ გააძლიერებენ, მაგრამ ყველაფრისთვის მზად უნდა ვიყოთ. უნდა ვიცოდეთ, რომ ამ ადამიანებს ვერ ვენდობით. იმიტომ, რომ თავიდანვე, ჩვენი მხრიდან რაიმე ესკალაციის შესახებ ყოველგვარი ცნობების გარეშე, ირანმა რუსეთს მიაწოდა იარაღი, ჩრდილოეთ კორეამ მიაწოდა იარაღი, დრონები, სარაკეტო ჭურვები, 155 კალიბრის არტილერიის საბრძოლო მასალა, 10 000 ჩრდილოეთკორეელი“, – განაცხადა ზელენსკიმ.
25 ივლისს ირანმა უკრაინა კასპიის ზღვაში მის სავაჭრო გემზე თავდასხმაში დაადანაშაულა. თეირანმა თავის გემზე თავდასხმას აგრესიის აქტი უწოდა და კიევი უკრაინაში ომის გაფართოების მცდელობაში დაადანაშაულა.
ირანის საგარეო საქმეთა სამინისტრომ ასევე განაცხადა, რომ ქვეყანა დაიცავს თავის ინტერესებსა და ეროვნულ უსაფრთხოებას საერთაშორისო სამართლის მიხედვით თავდაცვის პრინციპის შესაბამისად.