უნგრეთი ყოფილმა პრემიერ-მინისტრმა, ვიქტორ ორბანმა რუმინეთში, ბაილე-ტუშნადის საზაფხულო უნივერსიტეტში სიტყვით გამოსვლისას „ფიდესის“ ახალი სტრატეგია წარადგინა. მან მხარდამჭერებს ფართომასშტაბური „ეროვნული წინააღმდეგობის“ მოძრაობის ჩამოყალიბებისკენ მოუწოდა პრემიერ-მინისტრ პიტერ მადიარის „ტისას“ მთავრობის წინააღმდეგ, რომლის მმართველობასაც ორბანმა „სულ უფრო ავტორიტარული“ უწოდა.
ორბანის მტკიცებით, ახლა თვითკრიტიკის დრო არ არის და ოპოზიციურმა პარტიამ საკუთარი როლი ძირეულად უნდა გადაიაზროს. მისი თქმით, „ფიდესმა“ საქმიანობა მხოლოდ საპარლამენტო ჩარჩოებით არ უნდა შეზღუდოს და გარდაიქმნას ფართო სამოქალაქო მოძრაობად, რომელიც გაერთიანდება იმ ორგანიზაციებსა და მოქალაქეებთან, ვინც იცავს თავისუფლებას.
„ტისას“ ახალმა მთავრობამ პოზიციების განსამტკიცებლად სწრაფად მიმართა მასშტაბურ საკონსტიტუციო და საკანონმდებლო ცვლილებებს – მათ შორის დააწესა შეზღუდვები, რომლებიც ორბანს პოსტის ხელახლა დაკავების უფლებას ართმევს, ხოლო დეპუტატებისთვის 12-წლიანი ლიმიტი შემოაქვს. ეს რეფორმები, „ფიდესის“ ყოფილი მაღალჩინოსნების წინააღმდეგ დაწყებულ გამოძიებებთან ერთად, ორბანმა პოლიტიკურად მოტივირებულ კამპანიად შეაფასა, რომლის მიზანიც, მისი თქმით, ქვეყნის ეფექტიანი მართვა კი არა, „ტისას“ კონკურენტების დასუსტებაა.
მან ბოდიში მოიხადა „ფიდესის“ ყოფილი წევრის, მადიარის დაწინაურების გამო და ის პარტიის ყველაზე დიდ შეცდომად მოიხსენია.
ექს-პრემიერმა „ტისას“ მთავრობას მზარდი ეკონომიკური პრობლემები უწინასწარმეტყველა და განაცხადა, რომ მის პოლიტიკას მყარი საყრდენი არ გააჩნია. ორბანის ვარაუდით, შემოდგომისთვის ხელისუფლებას სერიოზული პრობლემები შეექმნება მაღალი ენერგომატარებლების, დეფიციტისა და ეკონომიკური წნეხის გამო, რაც ნათლად გამოაჩენს მისი მართვის უუნარობას.