რუსეთში, ვოლგოგრადის, თათრეთისა და კრასნოდარის მხარეებში გვიან ღამით Wildberries-ის რამდენიმე ობიექტსა და ნავთობგადამამუშავებელ ქარხანაზე იერიში განხორციელდა. ინფორმაციას უკრაინული მედია ავრცელებს.
ვოლგოგრადში Wildberries-ის სადისტრიბუციო ცენტრი დაზიანდა. 44 ათასი კვადრატული მეტრის ფართობის ლოგისტიკური კომპლექსი რეგიონს ემსახურება.
მედიის ცნობით, დარტყმის სამიზნე გახდა „ლუკოილ-ვოლგოგრადნეფტეპერერაბოტკას“ ნავთობგადამამუშავებელი ქარხანაც. ეს რუსეთის ერთ-ერთი უმსხვილესი გადამამუშავებელი საწარმოა, რომელიც ბენზინს, დიზელის საწვავს, საავიაციო საწვავსა და სხვა ნავთობპროდუქტებს აწარმოებს.
ვოლგოგრადის ოლქის გუბერნატორის, ანდრეი ბოჩაროვის განცხადებით, რეგიონზე განხორციელებული „მასშტაბური“ ღამის თავდასხმის შედეგად ხუთი ადამიანი დაშავდა. მისი თქმით, ქალაქში სამრეწველო ობიექტსა და სასაწყობე შენობაში ხანძარი გაჩნდა, თუმცა არ დაუკონკრეტებია, რომელ ობიექტებზე იყო საუბარი და არც Wildberries-ის საწყობსა და ნავთობგადამამუშავებელ ქარხანაზე გავრცელებულ ცნობებს გამოხმაურებია.
ბოლო პერიოდში რუსეთში Wildberries-ის ობიექტებზე თავდასხმები გახშირდა. მედიის ინფორმაციით, გასული კვირის განმავლობაში კომპანიის რამდენიმე ლოგისტიკური ცენტრი უკვე გახდა იერიშის სამიზნე.