პენტაგონმა საგანგებო დაფინანსების სახით მოთხოვნილი 67 მილიარდი დოლარიდან 18,2 მილიარდი დოლარის გამოყოფა მოითხოვა აშშ-ის ყველაზე თანამედროვე საჰაერო თავდაცვისა და მაღალი სიზუსტის შეიარაღების მარაგის შესავსებად. ინფორმაციას Bloomberg-ი ავრცელებს.
საუბარია Patriot-ის სისტემის PAC-3 MSE ტიპის რაკეტებზე, საზღვაო ძალების Tomahawk-ის ფრთოსან რაკეტებსა და არმიის THAAD-ის სისტემის მაღალი სიმაღლის რაკეტებზე.
Bloomberg-ის ინფორმაციით, მოთხოვნილი თანხიდან 5,75 მილიარდი დოლარი Lockheed Martin-ის წარმოების THAAD-ის რაკეტების შესაძენადაა გათვალისწინებული, ხოლო 5,57 მილიარდი დოლარი – Patriot-ის PAC-3 MSE მოდიფიკაციის დამატებითი რაკეტებისთვის.
სტრატეგიული და საერთაშორისო კვლევების ცენტრის (CSIS) ანალიტიკოსის კრის პარკის შეფასებით, აღნიშნული დაფინანსებით პენტაგონი შეიძენს: 1 137 ერთეულ PAC-3 MSE ტიპის რაკეტას; 479 THAAD-ის რაკეტას; 462 Tomahawk Land Attack Missile-ს; 433 Precision Strike Missile-ს (PrSM) და 442 SM-6 ტიპის რაკეტას.
კონგრესისთვის წარდგენილი დოკუმენტების მიხედვით, დაფინანსების პაკეტი ასევე მოიცავს 3,28 მილიარდ დოლარს RTX-ის წარმოების Standard Missile-ის სამი სხვადასხვა მოდიფიკაციის შესაძენად, ასევე 100 მილიონ დოლარს Lockheed Martin-ის ახალი კლასიფიცირებული ჰაერი-ჰაერი კლასის რაკეტის, Joint Advanced Tactical Missile (JATM)-ის შესაძენად, რომელიც ჯერ კიდევ არ არის შეიარაღებაში მიღებული.
დოკუმენტები, რომლებიც პენტაგონმა სენატისა და წარმომადგენელთა პალატის თავდაცვის კომიტეტებს გადაუგზავნა, ასახავს აშშ-ის შეშფოთებას შეიარაღების მარაგებთან დაკავშირებით იმ ფონზე, როდესაც ამერიკული ძალები ირანის წინააღმდეგ სამხედრო ოპერაციებს აწარმოებდა და რეგიონში მდებარე ბაზებზე განხორციელებულ ირანულ სარაკეტო და დრონებით შეტევებს იგერიებდა, წერს გამოცემა.