იტალია თითქმის ყველა მსხვილ ქალაქში მაღალი ტემპერატურის გამო განგაშის უმაღლეს, „წითელ“ დონეს აცხადებს, რადგან ქვეყანა სიცხის ახალმა ტალღამ მოიცვა.
ჯანდაცვის სფეროს წარმომადგენლები აცხადებენ, რომ ჩრდილოეთიდან სამხრეთამდე 19 ქალაქი – მათ შორის დედაქალაქი რომი, მილანი, ვენეცია და ნეაპოლი – უკვე „წითელი განგაშის“ ზონაშია, ორშაბათიდან კი ეს მდგომარეობა ქვეყნის 27 მსხვილი ქალაქიდან 25-ს შეეხება. გამონაკლისებია რეჯო-კალაბრია და მესინა, სადაც განგაშის „ნარინჯისფერი“ დონე იმოქმედებს.
შაბათს ბევრ ადგილას ტემპერატურამ 35°C-ს გადააჭარბა. ხელისუფლება აფრთხილებს მოსახლეობას, რომ საფრთხე ემუქრებათ არა მხოლოდ მოწყვლად ჯგუფებს (ხანდაზმულებს, პატარა ბავშვებსა და ქრონიკული დაავადებების მქონე პირებს), არამედ სრულიად ჯანმრთელ და აქტიურ ადამიანებსაც.
სპეციალისტები მოსახლეობას მოუწოდებენ, მოერიდონ სიცხესა და მზის პირდაპირ სხივებს ყველაზე ცხელ პერიოდში – 11:00-დან 18:00 საათამდე, დარჩნენ შენობებში და მიიღონ დიდი რაოდენობით სითხე.