დიდ ბრიტანეთში არსებობს შიშები „მსურველთა კოალიციის“ „ნელ სიკვდილთან“ დაკავშირებით, რაც დიდწილად ემანუელ მაკრონის თანამდებობიდან მოსალოდნელ წასვლას უკავშირდება, – წერს The Telegraph-ი.
საფრანგეთის პრეზიდენტს სხვა არჩევანი არ აქვს, გარდა იმისა, რომ დატოვოს ელისეს სასახლე მომავალი წლის საპრეზიდენტო არჩევნების შემდეგ, როდესაც მისი მეორე ვადა ამოიწურება. თუმცა, იმ აშკარა კანდიდატის არარსებობის ფონზე, რომელიც მის პოლიტიკას გააგრძელებდა, ბუკმეკერების ფავორიტი მის შემცვლელად მარინ ლე პენია – უკიდურესად მემარჯვენე პარტია „ეროვნული გაერთიანების“ ლიდერი.
მანამდე ის პირობას დებდა, რომ საფრანგეთს ნატოს სამხედრო სარდლობიდან გამოიყვანდა, რუსეთის წინააღმდეგ სანქციებს გააუქმებდა და უკრაინას მოუწოდებდა, დათანხმებოდა სამშვიდობო შეთანხმებას მოსკოვის პირობებით.რადიკალი მემარცხენე პოლიტიკოსი ჟან-ლიუკ მელანშონი, რომელიც ცხრა თვეში გასამართ არჩევნებზე მის ერთ-ერთ მთავარ კონკურენტად ითვლება, კიდევ უფრო შორს წავიდა და პირობა დადო, რომ დასავლური სამხედრო ალიანსიდან საერთოდ გამოვიდოდა.
წყარომ The Telegraph-ს განუცხადა, რომ ბრიტანელი ოფიციალური პირები უკვე სწავლობენ, თუ რა შეიძლება ნიშნავდეს ნებისმიერი მათგანის გამარჯვება ინგლისისა და საფრანგეთის ურთიერთობებისთვის, კერძოდ „მსურველთა კოალიციის“ მომავლისა და საიდუმლო სადაზვერვო ინფორმაციის გაცვლისთვის.
ერთ-ერთმა დასავლელმა ოფიციალურმა პირმა აღნიშნა, რომ ნატოს „დიდი პრობლემის“ წინაშე აღმოჩნდება, თუ ხელისუფლებაში ხისტი კურსის რომელიმე მომხრე მოვა.
ამან დიპლომატიურ წრეებში შემდგომი დისკუსიები გამოიწვია იმის შესახებ, თუ ვის შეუძლია მაკრონის მიერ დატოვებული ვაკუუმის შევსება და დიდ ბრიტანეთთან ერთად ლიდერის პოზიციის დაკავება. აშკარა კანდიდატი ფრიდრიხ მერცია, გერმანიის კანცლერი, რომელიც ხელმძღვანელობს თავისი ქვეყნის შეიარაღებული ძალების ევროპაში უდიდეს არმიად გარდაქმნის პროექტს.
თუმცა, როგორც გამოცემა წერს, ის შიდა კრიზისებშია ჩაფლული და სულ უფრო მეტ შეკითხვას აწყდება იმასთან დაკავშირებით, თუ კიდევ რამდენ ხანს შეძლებს ლიდერის პოსტის შენარჩუნებას.
ამიტომ, ახლა დგას საკითხი, შეძლებს თუ არა დიდი ბრიტანეთის პრემიერ-მინისტრი ენდი ბერნემი კოალიციის ლიდერობის საკუთარ თავზე აღებას.
ივლისის შუა რიცხვებში პოლონეთის პრემიერ-მინისტრმა დონალდ ტუსკმა გამოაცხადა, რომ პოლონეთი შემოდგომაზე უმასპინძლებს ფრანგული და ბრიტანული ჯარების ერთობლივ სწავლებებს, რომელთა მიზანია მათი მომზადება ომის შემდეგ უკრაინისთვის უსაფრთხოების გარანტიების მისაწოდებლად.