ნიკა გვარამია და წინა ხელისუფლების წარმომადგენლები როდესაც ურთიერთობენ ადამიანთან, რომელიც მათგან განსხვავებულია, რეპრესიის, მუქარისა და დაშინების ენით ესაუბრებიან, – ამის შესახებ საპარლამენტო უმრავლესობის წევრმა, ირაკლი ქადაგიშვილმა განაცხადა.
მისივე თქმით, წინა ხელისუფლებას ჩადენილი დანაშაული არ მოუნანიებია და ეს ცოდვა მთელი პოლიტიკური ცხოვრება მიჰყვებათ.
„პარლამენტის შენობაში საგამოძიებო კომისია მუშაობდა, რომელიც ნიკა გვარამიას და მისი ხელისუფლებაში ყოფნის პერიოდს შეისწავლიდა. ვინც ამას თვალყურს ადევნებდა, მათთვის ნათელი იყო, თუ რა მეთოდებით, სისასტიკით და უნდობლობით ეპყრობოდნენ ადამიანებს, მოქალაქეებს, ბიზნესს. არ აქვს მნიშვნელობა, რა სფეროში მუშაობდი და მოღვაწეობდი, თუ მათი ინტერესების გამტარი არ იყავი, შენზე მათი რეპრესიული აპარატი მოქმედებდა. რა თქმა უნდა, მათ ეს ყველაფერი არ მოუნანიებიათ, ერთხელაც არ უთქვამთ, რომ ეს იყო ქართველი ერისა და სახელმწიფოს წინააღმდეგ ჩადენილი დანაშაული, ამიტომ ეს მოუნანიებელი ცოდვა მთელი თავიანთი პოლიტიკური ცხოვრების განმავლობაში მიჰყვებათ.
ყოველთვის, როდესაც ისინი სხვა ადამიანებთან ურთიერთობაში შედიან, რომელიც მათგან განსხვავებულია, სწორედ ამ რეპრესიის, მუქარისა და დაშინების ენით საუბრობენ. ქართველ ხალხს, დიდი ხანია, მათი მუქარისა და მათი რეპრესიების აღარ ეშინია. რამდენს იფაფხურებს ამ თავისი ტერმინოლოგიით, რომელიც მამაკაცსაც არ შეშვენის. „დაოკდი“ – უთხრას, თავის ოჯახში თუ ვინმე ჰყავს დასაოკებელი და გარეთ ქალებზე ნუ ლაპარაკობს ასეთი ტერმინებით“, – განაცხადა ქადაგიშვილმა.
ცნობისთვის, პარლამენტის ვიცე-სპიკერმა, ნინო წილოსანმა სოციალურ ქსელში გამოაქვეყნა ვიდეო და განაცხადა, რომ „ოპოზიციის ალიანსის“ ერთ-ერთი ლიდერი ნიკა გვარამია მას ემუქრება.
„ნინო წილოსანს მივმართავ, ხელისუფლება რომ შეიცვლება, ისე შეგაგულიანებ, ყველაფერი მოყვე, დაოკდი, დამიჯერე, შენთვის ასე აჯობებს“, – აცხადებს ნიკა გვარამია გავრცელებულ ვიდეოში.