მიგრაციის მიმართულებით შესაბამისი სამართლებრივი და საკანონმდებლო, მატერიალურ-ტექნიკური ბაზის მოწესრიგება სახელმწიფომ ძალიან დროულად დაიწყო, – განაცხადა გადაცემაში „დღის ქრონიკა“ საქართველოს შინაგან საქმეთა მინისტრის მოადგილე ალექსანდრე დარახველიძემ ახალ საკანონმდებლო რეგულაციასთან დაკავშირებით.
კერძოდ, სისხლის სამართლის წესით დასჯად ქმედებად გამოცხადდა საქართველოს მოქალაქის ქორწინება უცხო ქვეყნის მოქალაქესთან, თუკი ეს ქორწინება მიზნად არ ისახავდა ოჯახის შექმნას და ფიქციური ქორწინების მთავარი მიზანი იყო უცხოელისთვის ქვეყანაში ლეგალურად ცხოვრების უფლების მოპოვება.
დარახველიძის თქმით, მიგრაციული პოლიტიკა და მიგრაციული ნაკადების მართვა თანამედროვე მსოფლიოს ერთ-ერთ მნიშვნელოვან გამოწვევას წარმოადგენს.
„ევროპაში ეს საკითხი ძალია მტკივნეულად დგას. არა მარტო ევროპაში, ამერიკაში და ა.შ. არაერთი მნიშვნელოვანი ცვლილება ხორციელდება იმისათვის, რომ ეს პრობლემა აღმოიფხვრას. საქართველოც არ არის გამონაკლისი ამ მხრივ. რა თქმა უნდა, ჩვენ იმ მასშტაბის პრობლემა არ გვიდგას, რაც ევროპას აქვს, მაგრამ ეს ისეთი პრობლემაა, თუკი დროული ჩარევა არ მოხდება და სახელმწიფოს არ ექნება ეფექტიანი პოლიტიკა მიგრაციული ნაკადების მართვისთვის, ამ შემთხვევაში ძალიან მალე შეიძლება დადგეს ის სავალალო შედეგები, რომელიც არაერთ ევროპულ ქვეყანას აქვს. სწორედ ამ მიმართულებით სახელმწიფომ ძალიან დროულად დაიწყო შესაბამისი სამართლებრივი და საკანონმდებლო, მატერიალურ-ტექნიკური ბაზის მოწესრიგება. ჯერ კიდევ გასულ წელს გვქონდა ჩვენ საკმაოდ მნიშვნელოვანი საკანონმდებლო პაკეტი, როდესაც თავშესაფრის პროცედურა, რომელიც ერთ-ერთი „კარგი მექანიზმი“ იყო არალეგალური მიგრაციის ხელშესაწყობად, ეს საკითხები მოწესრიგდა. ამის შემდგომ შრომითი მიგრაციის საკითხებს ეხებოდა. საკმაოდ მტკივნეული იყო საზოგადოებისთვის, როდესაც საქართველოს მოქალაქეები კარგავდნენ სამუშაო ადგილებს და მათ ადგილზე უცხოეთის არაერთი მოქალაქე დასაქმდა. ბოლო ცვლილებებმა, მესამე ტალღამ, რომელიც 2026 წლის 25 ივნისს დაამტკიცა საქართველოს პარლამენტმა, მთლიანად შეცვალა მიდგომა ნებართვების მხრივ. ვგულისხმობ ბინადრობის ნებართვებთან მიმართებით“, – აღნიშნა მან.