მატარებელში „კიევი-ვარშავა“, რომელზეც დღეს დილით რუსეთმა იერიში მიიტანა, დასავლელი მაღალჩინოსნები იმყოფებოდნენ. მათ შორის იყვნენ გერმანიის კანცლერის, ფრიდრიხ მერცის ერთ-ერთი უახლოესი მრჩეველი გიუნტერ ზაუტერი და დიდი ბრიტანეთის ყოფილი პრემიერ-მინისტრი ბორის ჯონსონი, წერს Spiegel-ი წყაროებზე დაყრდნობით.
„გუნტერ ზაუტერი, კანცლერის ოფისის მრჩეველი საგარეო პოლიტიკისა და უსაფრთხოების საკითხებში, შაბათს საღამოს კიევიდან პოლონეთისკენ მიმავალ ღამის მატარებელში იმყოფებოდა. დილის დაახლოებით 05:00 საათზე მატარებელი პოლონეთის საზღვართან გაჩერდა, სასაზღვრო ზონაში დრონების დარტყმების გამო კი, მატარებლის მგზავრთა ევაკუაცია განხორციელდა“, – წერს გამოცემა.
ჟურნალისტები აღნიშნავენ, რომ ზაუტერი კიევში დიდი ბრიტანეთის, საფრანგეთისა და იტალიის უსაფრთხოების მრჩევლებთან ერთად, უკრაინელ ოფიციალურ პირებთან შეხვედრაზე იმყოფებოდა, შაბათს კი, უსაფრთხოების საერთაშორისო კონფერენციას YES დაესწრო.
მერცის მრჩევლის გარდა, მატარებელში ევროპული მთავრობების უსაფრთხოების სხვა მრჩევლები, გერმანიის ბუნდესტაგის წევრები, დიპლომატები, მეცნიერები და დიდი ბრიტანეთის ყოფილი პრემიერ-მინისტრი ბორის ჯონსონიც იმყოფებოდნენ.
დილით რუსულმა დრონმა იერიში მიიტანა სამგზავრო მატარებლის „კიევი-ვარშავას“ ლოკომოტივზე, რომელიც საზღვრიდან დაახლოებით ორ კილომეტრში იყო გაჩერებული. როგორც უკრაინის რკინიგზაში აღნიშნეს, მგზავრებმაც და პერსონალმაც დროულად მოასწრეს ევაკუაცია და არავინ დაშავებულა.
მოგვიანებით კომპანიამ განაცხადა, რომ მატარებლები როგორც ვარშავის, ისე საპირისპირო მიმართულებით უკვე გააგზავნა, თუმცა, მოძრაობის გრაფიკში საკმაოდ მნიშვნელოვანი შეფერხებებია.