“კულტურის მინისტრმა ნიკა რურუას დანაპირები შეუსრულა”

ქეთი დოლიძე თუმანიშვილის თეატრის სამხატვრო ხელმძღვანელი აღარ არის.  კულტურის მინისტრმა მიხეილ გიორგაძემ ამ გადაწყვეტილებას ხელი დღეს მოაწერა.
როგორც „კვირას“ ქეთი დოლიძემ განუცხადა, იგი თეატრში 17 სექტემბრამდე დარჩება.
მისივე თქმით, კულტურის მინისტრმა ყოფილი მინისტრის, ნიკა რურუას დაკვეთა შეასრულა.
„მე 17 სექტემბრამდე ვერავინ შემეხება და 17 სექტემბრამდე ვრჩები თეატრში. 5 სექტემბერს თეატრის დასი ჩამოდის თბილისში, ვნახოთ, რა გადაწყვეტილებას მიიღებს დასის შემადგენლობა.
იმიტომ, რომ აქეთ ათნი არიან და დანარჩენები – იქით. ვნახოთ, დასის შემადგენლობა როგორ იმოქმედებს, ვნახავ, ვინ მიიღო ამ „მკვლელობაში“, ამ უზნეობასა და უსინდისობაში მონაწილეობა. როგორც ჩანს, კულტურის მინისტრმა ყოფილი მინისტრის, ნიკა რურუას დანაპირები შეუსრულა. ეს გაუნათლებელი. ნიკა მაინც უზომოდ განათლებულია და ამან საერთოდ იცის, რა არის თეატრი? „ – აღნიშნა „კვირასთან“ საუბრისას ქეთი დოლიძემ.
მისი თქმით, იგი ამჟამად, ქალაქგარეთ იმყოფება და მინისტრის ბრძანების შესახებ ინფორმაცია ტელეფონით შეიტყო.
ქეთი დოლიძის ადგილს ქუთაისის მესხიშვილის სახელობის თეატრის ყოფილი სამხატვრო ხელმძღვანელი გიორგი სიხარულიძე დაიკავებს.
რამდენიმე წუთის წინ, ქეთი დოლიძემ სოციალურ ქსელში სტატუსიც გამოაქვეყნა:
„5 წუთის წინ მანანა ბერიკაშვილი ახალ ფეხსაცმელს ყიდულობდა ბათუმში! იმ სიკეთით გაცვითე, რა სიკეთეც ჩაიდინე! მკვლელები ხართ! ბრავო! ჩააკითხე ნინელის, ზაზას და 10 მოღალატეს! მანდვე არიან, გრიგოლეთში! იზეიმეთ!
წავედი, ბერტოლუჩის უნდა ვუყურო!!!“ – წერს ქეთი დოლიძე სოციალურ ქსელში.