უკრაინის შინაგან საქმეთა სამინისტროს კოლეგიის წევრი, სახალხო დეპუტატი ანტონ გერაშენკო მიიჩნევს, რომ მიხეილ სააკაშვილის მომხრეებს საზღვრის გარღვევის დროს სისხლისღვრა სურდათ. ამის შესახებ გერაშენკომ სოციალურ ქსელ „ფეისბუქში“ დაწერა.
„მიხეილ სააკაშვილის ხელმძღვანელობით პროვოკატორთა ჯგუფის მიერ შეგინის გამშვებ პუნქტზე საზღვრის გარღვევის დროს ხუთმა მესაზღვრემ და 11 პოლიციელმა ტრავმები მიიღო. იმ პროვოკატორების მთავარ მიზანს, რომლებმაც უკრაინის სახელმწიფო საზღვარი უკანონოდ გაარღვიეს, სამართალდამცავი ორგანოების თანამშრომლების მხრიდან ბრუტალური ძალადობის სცენების თანხლებით სისხლისღვრის მიღწევა იყო. პროვოკატორებმა ამ მიზანს ვერ მიაღწიეს, პირიქით, ყველა გონიერი ადამიანისთვის ცხადი გახდა, რომ უკრაინაში ხელისუფლების ხელში ჩასაგდებად სააკაშვილიც და ტიმოშენკოც მზად არიან, ცხედრებზე გაიარონ“, -წერს გერაშენკო.
გერაშენკოს ინფორმაციით, მესაზღვრეებს ნაბრძანები ჰქონდათ, არ გამოიყენონ იარაღი და სპეციალური საშუალებები პროვოკატორების ჯგუფის წინააღმდეგ, რომელსაც მიხეილ სააკაშვილი ხელმძღვანელობდა.
„უკრაინის ხელისუფლებისთვის ერთადერთი სწორი გადაწყვეტილებაა კანონის შესაბამისად მუშაობა. ამიტომ უკრაინის გენერალური პროკურორის იური ლუცენკოს გუშინდელი განცხადება უნდა დასრულდეს ბრალის წაყენებით ყველა პირისთვის, ვინც უკრაინის სახელმწიფო საზღვარი მიზანმიმართულად დაარღვია, მათ შორის უკრაინის სახალხო დეპუტატებს შორის მყოფი პროვოკატორებისთვის, რომლებმაც საზღვრის უკანონო გადაკვეთის ცუდი მაგალითი აჩვენებს“, -აღნიშნავს გერაშეკო.