აფხაზეთის უმაღლესი საბჭოს დეპუტატი თამაზ ხუბუა ხურჩაში სეპარატისტთა ე.წ. მესაზღვრის მიერ გიგა ოთხოზორიას დემონსტრაციული მკვლელობას აფასებს და „ახალ თაობასთან“, აფხაზების განწყობებზე საუბრობს.
„ორი-სამი ზარი მქონდა აფხაზეთში და საკმაოდ სერიოზული ადამიანებისგან მივიღე ინფორმაცია, რომ ძალიან შეწუხებული და დაინტერესებული არიან, ყველაფერი გაირკვეს“ – განაცხადა თამაზ ხუბუამ.
მისი თქმით, მკვლელი, გვარის მიხედვით კანჯი-ოღლი ლაზია, რაც კიდევ უფრო ამძიმებს სიტუაციას, იმიტომ რომ ის არის მეგრელი, აფხაზი არ არის. ის დაქირავებული ან თურქეთიდან წამოსული სულგაყიდული ადამიანია.
„არ მინდა, ვინმემ ქსენოფობია დამდოს ბრალად, მაგრამ, როცა თვალწინ უდანაშაულო კაცს განსაკუთრებული ცინიზმით მოგიკლავენ, ქვეყნის შესაბამისმა სამსახურმა მიწიდან უნდა ამოიღოს, იპოვოს და დასაჯოს ნაძირალა მკვლელი, მით უმეტეს, როგორც ცხადდება, ის იდენტიფიცირებულია.
პირდაპირ ვამბობ – სპეცსამსახურებს დამნაშავე უკვე დაკავებული და გადმოყვანილი უნდა ჰყავდეთ ჩვენს კონტროლირებად ტერიტორიაზე. ეს არის ღირსეული ერის, ღირსეული სპეცსამსახურის, ღირსეული ხელმძღვანელობის მიერ გადადგმული ნაბიჯი.
რამდენად პარადოქსულადაც უნდა მოგეჩვენოთ, ვფიქრობ, აფხაზები ძალიან შეწუხებულები არიან. თუ ჩემი ვარაუდები გამართლდა, ძალიან უნდა შეუწყონ ხელი კანჯი-ოღლის დაპატიმრებასა და გადმოცემას. მაშინ ვირწმუნებ ბოლომდე, რომ აფხაზებს ყველაფერი დაკარგული არ აქვთ“ – აცხადებს ხუბუა.