ციანიდის საქმის მთავარი მოწმე, ჟურნალისტი ირაკლი მამალაძე დაქორწინდა. მისი რჩეული ქიმიკოსი მონიკა ქართველიშვილი გახლავთ. ქრისტეს ასაკში მყოფი სკანდალური ჟურნალისტი ამბობს, რომ მეუღლე მასზე 11 წლით უმცროსია, თუმცა ეს მათ ურთიერთობას სულ არ უშლის ხელს. უკავშირდება თუ არა წყვილის გაცნობა გახმაურებულ საქმეს, როგორ გამოუტყდა სიყვარულში ჟურნალისტი ქიმიკოსს და არის თუ არა დისკომფორტი პირადი დაცვა წყვილისთვის? ირაკლი მამალაძე „პრაიმტაიმს“ ექსკლუზიურად უამბობს:
– ირაკლი, გაცნობის ისტორიით დავიწყოთ…
– ერთი წლის წინათ ჩემი მეგობრის დაბადების დღეზე გავიცანით ერთმანეთი. მაშინვე გამოვხატე ინტერესი. ძალიან ლამაზი მწვანე ფერის თვალები აქვს, რაც იშვიათია. კომუნიკაბელური და სასიამოვნო გოგონა აღმოჩნდა.
– ასაკობრივი სხვაობა გქონიათ…
– კი, 11 წლის უმცროსია ჩემზე, მაგრამ მისი აზროვნება გაცილებით ასაკიანია, ვიდრე თავად. 22 წლის არის, მეხუთე კურსის სტუდენტია. სწავლობს ივ. ჯავახიშვილის სახელობის სახელმწიფო უნივერსიტეტში… სოციალური ქსელით გაგრძელდა ჩვენი ურთიერთობა. გარკვეული პერიოდის შემდეგ გვქონდა პაუზა, მაგრამ სულ მქონდა განცდა, რომ ეს გოგონა აუცილებლად იქნებოდა ჩემ გვერდით.
– რამ გამოიწვია პაუზა?
– ვერ გეტყვით, რატომღაც ასე მოხდა. არ მინდოდა, ეს ყველაფერი ხელოვნური ყოფილიყო, ბუნებრივად მინდოდა განვითარებულიყო მოვლენები. შემდეგ სამსახურებრივად რაღაცაში დამჭირდა მისი დახმარება და კვლავ შევხვდით ერთმანეთს. იმ დღიდან განვაახლეთ ურთიერთობა. ამ დღიდან ძალიან მალე, 14 თებერვალს, სიყვარულის დღეს მასთან მივედი საჩუქრით და სიყვარულში გამოვუტყდი. ეს იყო ჩვენი პირველი სერიოზული პაემანი. დღეს უკვე ცოლ-ქმარი ვართ.
– ირაკლი, მანამდე თუ გქონია სერიოზული ურთიერთობები…
– ოჯახი არ მყოლია, სერიოზული ურთიერთობების რა გითხრა. ზოგადად, ისეთი ადამიანი ვარ, რომ ერთ სამსახურშიც კი დიდხანს ვერ ვძლებ. მიყვარს ცვლილებები პირადშიც და კარიერაშიც.
– მერე არ გეშინია, ოჯახი რომ შექმენი, ისევ ცვლილებებისკენ რომ გაგიწიოს გულმა?
– არა, რადგან ამ ასაკში გადავწყვიტე…
– ქრისტეს ასაკში ხარ…
– ჰო, 33 წლის ვარ. ჩემ ირგვლივ ძირითადად პატარა ასაკში შექმნილი ოჯახები ინგრევა. მე მგონია, ოჯახი ისეთ ასაკში შევქმენი, რომ პრობლემები აღარ უნდა იყოს.
– რა კრიტერიუმები გქონდა, როგორი უნდა ყოფილიყო შენი მეორე ნახევარი?
– მთავარი მაინც, ალბათ, შეგნებაა ჩემთვის. უნდა შეეძლოს ქალს ოქროს შუალედის, ზომიერების პოვნა ნებისმიერ სიტუაციაში.
– სკანდალური ჟურნალისტის ცოლობა მარტივი არ არის. თუ იყო ბარიერი შენი პროფესია თქვენს ურთიერთობაში?..
– ზუსტად ამაზე ვლაპარაკობ, არასდროს ჩაერევა მონიკა ჩემს საქმეში, ჩემს პროფესიულ ნიუანსებში.
– რა ფაკულტეტზე სწავლობს მონიკა, რა პროფესიის არის?
– ქიმიკოსია. ასე რომ, ციანიდთან არც ის არაა შორს (იღიმება)… ამ ამბებმა, რა თქმა უნდა, ისიც შეაწუხა. ინერვიულა, ქიმიკოსმა ყველაზე უკეთ იცის, იმ რაოდენობის ციანიდს არავინ იყენებს კარგი მიზნებისთვის.
– ირაკლი, შენ ამ დრომდე დაცვის თანხლებით გიწევს გადაადგილება, ეს დისკომფორტს არ გიქმნით ახალ წყვილს?
– ჯარით ხომ არ დავდივარ, საუბარია ორ ადამიანზე. ეს აუცილებელია და მონიკაც გაგებით ეკიდება. არსებობს საფრთხე და სახელმწიფომ გადაწყვიტა, რომ უნდა დამიცვას. გარკვეულწილად დისკომფორტი არის, რა თქმა უნდა.
– დაცვა სახლშიც გყავს?
– ეს კონფიდენციალური ინფორმაციაა, ამას ვერ გავამხელ.
– ხმაურიანი არ ყოფილა შენი ქორწილი…
– ჰო, ასე გადავწყვიტეთ. ამ ფონზე ნამდვილად არ იქნებოდა უპრიანი ხმაურიანი და გრანდიოზული ქორწილი. ძალიან მოკრძალებულ წრეში აღვნიშნეთ ჩვენი ერთად ყოფნა მე და მონიკამ, ჩემს სახლში, მხოლოდ ნათესავების გარემოცვაში.
– მონიკას ნათესავებმა როგორ მიგიღეს?
– ძალიან კარგი მშობლები ჰყავს მონიკას. დედა სამედიცინო სფეროშია, მამა ბიზნესშია ჩართული. როგორც ჩანს, შვილის გადაწყვეტილებას პატივს სცემენ. ნეგატიური განწყობა ნამდვილად არ მიგრძნია მონიკას ნათესავებისგან.
– ირაკლი, უარყოფით გამოხმაურებას ელოდები შენს ბედნიერებაზე?
– საჯარო პირი ვარ. მე კი არა, ტრამპს აკრიტიკებენ. დიდად არ განვიცდი, ზოგს კარგი იუმორი აქვს, ისეთი, რომ მეც კი მეცინება ხოლმე.
– შვილებზე ისაუბრეთ უკვე, რამდენი შვილი გინდათ გყავდეთ?
– რამდენსაც ღმერთი მოგვცემს.
ნინო მჭედლიშვილი
„პრაიმტაიმი“