არჩილ თალაკვაძე – არსად არ მოხდება არანაირი გაყალბება

სახელისუფლებო გუნდის მთავარი მიზანი და მოტივაციაც არის თავისუფალი, დემოკრატიული არჩევნების ჩატარება, – ამის შესახებ „ქართული ოცნების“ საარჩევნო შტაბის ხელმძღვანელმა არჩილ თალაკვაძემ ოპოზიციის მოწოდების საპასუხოდ განაცხადა, რომლის მიხედვითაც ოპოზიცია ხელისუფლებას მოუწოდებს, რომ არ გააყალბოს არჩევნები. თალაკვაძემ აღნიშნა, რომ ხელისუფლების მიერ ჩატარებული რამდენიმე არჩევნების შემდეგ, საერთაშორისო სადამკვირვებლო მისიების დასკვნებში არსად არ არის საუბარი გაყალბებაზე.
„ყველაზე მნიშვნელოვანი არის სადმაკვირვებლო ორგანიზაციების დასკვნები, როდესაც ბოლო წლებში, ყველა არჩევნებთან მიმართებაში, ცალსახად არის ნათქვამი, რომ არჩევნები ტარდება თავისუფალ, სამართლიან, გამჭვირვალე გარემოში და გაყალბებეზე იქ საუბარი არ არის არცერთ ანგარიშში. დღეს, თვითმმართველობის არჩევნებშიც, სახელისუფლებო გუნდის მთავარი მიზანი და მოტივაციაც არის თავისუფალი, დემოკრატიული არჩევნების ჩატარება, მით უმეტეს, როდესაც ჩვენ, წინასწარი კვლევებითაც გვაქვს დიდი მხარდაჭერა მოსახლეობაში. შესაბამისად ჩვენი უპირველესი ინტერესი არის ის, რომ არ იქნას დაშვებული არსად, არცერთ უბანზე გაყალბება და ეს ასეც იქნება, არსად არ მოხდება არანაირი გაყალბება. არჩევნები ჩატარდება მშვიდ დემოკრატიულ, გამჭვირვალე და თანაბარ პირობებში“, – განაცხადა თალაკვაძემ.