თიანეთის მერი, თამაზ მეჭიაური საზოგადოებას ჰპირდება, რომ იმ შემთხვევაში, თუ საცხოვრებელ სახლს ადგილობრივი მოსახლე მიაქირავებს, ბინის ქირას საკუთარი ხელფასიდან დაფარავს.
როგორც „კვირას“ თამაზ მეჭიაურმა განუცხადა, მას საცხოვრებელი სახლი თიანეთის რაიონის სოფელ ჟებოტაში აქვს, თუმცა, თანამდებობის პირისთვის კეთილმოუწყობელია.
სწორედ ამიტომ, თიანეთის მერი სამსახურთან ახლოს ბინას ეძებს.
„ვიქირავებ თიანეთის ცენტრში 1-2 ოთახიან კეთილმოწყობილი ბინას…. ჟებოტაში ბინა მაქვს, მაგრამ პირობები არა…“ – ამის შესახებ ინფორმაცია თამაზ მეჭიაურმა სოციალურ ქსელში დღეს დილით გამოაქვეყნა.
ამ საკითხთან დაკავშირებით „კვირა“ თიანეთიას მერს თამაზ მეჭიაურს დაუკავშირდა.
“რაც შეეხება ბინას, მე მაქვს ბინა სოფელ ჟებოტაში, მაგრამ იქ დიდი ხანია არ მიცხოვრია და არანაირი პირობები არ არის. ბინა მჭირდება. ქირას ჩემი ხელფასიდან გადავიხდი. ჩემი ჯიბიდან, მე თვითონ ვისტუმრებ სტუმრებს, სხვათაშორის ბენზინსაც ჩემი ჯიბიდან ვასხამ და დავდივარ არასახელმწიფო მანქანით. იმიტომ, რომ ისეთ მდგომარეობაში დატოვეს მანქანა, იმით სიარული შეუძლებელია“, – განაცხადა თამაზ მეჭიაურმა.
ამასთან, „კვირას“ კითხვაზე, საკუთარი ხარჯებით, რომ სოფელ ჟებოტაში ბინა კეთილმოაწყოს და სამსახურში სოფლიდან იაროს, თიანეთის გამგებელი აცხადებს, რომ „როცა მოვაწყობ ჟებოტაში ბინას, მაშინ იქიდან ვივლი“ .
აღსანიშნავია, რომ რამდენიმე წლის წინ, „ლეიბორისტული პარტიის“ წევრმა გიორგი გუგავამ საქართველოს პარლამენტს განცხადებით მიმართა, სადაც იგი სახელმწიფოს ბიუჯეტის ხარჯზე ბინის ქირის ანაზღაურებას ითხოვდა. თუმცა, გიორგი გუგავამ მაშინ პარლამენტს ბოიკოტი გამოუცხადა და პარლამენტის სხდომებს არ ესწრებოდა.
წყარო: „კვირა“