თბილისის მერი კახა კალაძე ნაძალადევის რაიონში მონადირის ქუჩის კაპიტალური რეაბილიტაციის ფარგლებში მიმდინარე სამუშაოებს გაეცნო.
კახა კალაძემ მერიის კეთილმოწყობის საქალაქო სამსახურის უფროსს გივი კუბლაშვილს უმოკლეს ვადაში გზის საფარის დაგება დაავალა.
„მიმდინარეობს სარეაბილიტაციო სამუშაოები, მოხდა კომუნიკაციის მოწესრიგება. ამ ქუჩაზე არ არსებობდა კანალიზაციის სისტემაც. შესაბამისად, მოწესრიგდა და მოეწყო ინფრასტრუქტურა. ხვალიდან დაიწყება ქუჩის მოასფალტება და შემდეგი ეტაპი იქნება უკვე ქუჩაზე არსებული ჩიხების მოწესრიგება, რომელიც 2018 წელს მოხდება“, – განაცხადა კახა კალაძემ.
თბილისის მერიის ინფორმაციით, პროექტის ფარგლებში 3 289 მეტრზე სრულად შეიცვალა მიწისქვეშა კომუნიკაციები.
მონადირის ქუჩის რეაბილიტაციას თბილისის მერიის კონტრაქტორი კომპანია შპს „ვიაპი +“ ახორციელებს და სამუშაოებისთვის თბილისის ბიუჯეტიდან 836 404,92 ლარია გამოყოფილი.