პარლამენტის განათლების კომიტეტის თავმჯდომარის, მარიამ ჯაშის განცხადებით, ხორავას ქუჩაზე მომხდარმა ტრაგედიამ საზოგადოებას კიდევ ერთხელ დაანახა, რომ აუცილებელია არსებული კანონმდებლობის აღსრულების მექანიზმები გამკაცრდეს.
მისივე თქმით, რეგულაციები უნდა გაძლიერდეს როგორც საკანონმდებლო, ასევე კანონქვემდებარე აქტების დონეზე.
“მზად ვართ, აღნიშნულ პროცესში მონაწილეობა მივიღოთ და თუკი კანონმდებლობის დონეზე ცვლილებების მომზადების რეკომენდაცია იქნება, პარლამენტის მიერ გაზიარებული იქნება. ეს ძალიან კომპლექსური საკითხია. თუკი კვლევის მონაცემებს დავაკვირდებით, ძალადობის მსხვერპლი ან თავად ძალადობის ჩამდენი მოზარდები არიან, ან სოციალურად დაუცველები, ან სოციალურად დაუცველთა ზღვართან მყოფი ოჯახების შვილები. ასევე არსებულ ოჯახებში ხშირია განქორწინება, რაც განსაკუთრებულ მიდგომას მოითხოვს.
განათლების მინისტრის გადაწყვეტილებას მივესალმები, რომ სკოლებში ფსიქოლოგიური სამსახური უნდა გაძლიერდეს. როცა საუბარი პრევენციაზეა, აქ მხოლოდ დისციპლინურ-დამსჯელობით ღონისძიებებზე არ უნდა იყოს მსჯელობა. ეს უნდა იყოს ფართო მასშტაბიანი საინფორმაციო-საკონსულტაციო სერვისების კომპლექსი, რომელიც მანდატურის სამსახურთან კოორდინაციაში უზრუნველყოფენ ჩვენი შვილების დაცვას.
ძალადობის ერთ-ერთი გამოვლენა ბულინგია, რასთან დაკავშირებითაც რეგულაციები ძირითადად განათლების სამინისტროს მიერ შემუშავებული სამოქმედო გეგმებსა და ბრძანებებს მოიცავს. ამდენად, აუცილებლად უფრო მაღალ იერარქიულ დონეზე უნდა ავიყვანოთ პრევენციისა და დაგეგმვის საკითხები. აუცილებლად გვჭირდება საზოგადოებრივი მოძრაობა, რომელიც ძალადობრივი ფორმების გამოვლინებას ნულოვან ტოლერანტობას გამოუცხადებს”, – განაცხადა ჯაშმა.