„უცხოეთიდან ახლობლების მიერ გამოგზავნილი ამანათების ნაწილი რომ საქართველოში უკვალოდ ქრება, ამის შესახებ, ალბათ, თქვენც ხშირად გსმენიათ. გარდა ამისა, ყოფილა არაერთი შემთხვევა, როდესაც ონლაინ-მაღაზიიდან ვიწერთ ჩვენთვის სასურველ პროდუქტს, თუმცა საქართველოში ან გახსნილი გხვდება, ან საერთოდ არ გვხდება. შესაბამისი საჩივრით უკმაყოფილო მომხმარებლები „საქართველოს ფოსტას“ არაერთხელ მიმართავენ“, – წერს გაზეთი „პრაიმტაიმი“ დღევანდელ ნომერში, სადაც მოქალაქე მ.გ-ს ისტორიის შესახებ იუწყება, რომელიც მსგავსი ფაქტის წინაშე აღმოჩნდა:
„ამანათი გამოვგზავნე მილანიდან. როგორც ვიცი, საქართველოს ფოსტის მეშვეობით კომპანია „ჯორჯიან ექსპრესი“ ახორციელებს ამანათების გადაგზავნას ევროპიდან. ჩემ მიერ გამოგზავნილი იქნა სამი ამანათი, რომელთაგან 2 ჩაბარდა ადრესატს, მესამე, ჩემი ძმის სახელზე გამოგზავნილი, დაიკარგა. უფრო სწორად, ადრესატს არ მიუღია არანაირი შეტყობინება მის გასატანად. ფოსტაში დაგვიდასტურეს 3 ამანათის მიღება, რომელთა გაცემა მითითებულ პერიოდში ხდებოდა ქეთევან წამებულის გამზ. მდებარე ზემოხსენებული კომპანიის ოფისიდან. შემოსავლების სამსახურმა მოკვლევაც კი დაიწყო. როგორც ამ ოფისში აცხადებენ, ამანათი გაცემულია, ოღონდ იმასაც ამბობენ, რომ 3 თვის შემდეგ ანადგურებენ მიმღებთა ხელმოწერების აღმნუსხველ უწყისებს. იმასაც განმარტავენ, რომ ერთი და იმავე პირისგან გამოგზავნილი ამანათის არგატანის შემთხვევაში მეორე ამანათის მიმღებ პირს უკავშირდებიან, რაც ჩემი ამანათების შემთხვევაში არ გაუკეთებიათ, ანუ ჩემი ძმისთვის ხომ არ დაურეკავთ და, არც ჩემი დის ან დისშვილისთვის არ შეუტყობინებიათ. ჩემმა დამ ტერმინალებიც მოიძია და ექსპერტთანაც გადაამოწმა, რომ ამანათი ზ.გ-ს სახელზე გაგზავნილი არაა შესული გასანადგურებლად, როგორც ეს ფოსტაში აგვიხსნეს – გარკვეული პერიოდის გასვლის შემდეგ ტვირთის საბაჟოზე დაბრუნება ან უარეს შემთხვევაში მისი სახელმწიფო საკუთრებაში გადაცემა ხდებაო. ამანათები არ ნადგურდება და არც დოკუმენტაცია, 3 წელი მაინც ინახება. ან როგორ თანამშრომლობენ ამ უპასუხისმგებლო კომპანიასთან? თუკი ჭოროხის ქ. #7-ში მდებარე ოფისში თვეობით ინახავენ გაუტანელ ამანათებს, ქეთევან წამებულზე არსებული ოფისიც „ჯორჯიან ექსპრესის“ არაა? უნდობლობას ვუცხადებ მითითებულ კომპანიას და „საქართველოს ფოსტასაც“, რადგან უპასუხისმგებლო და გულგრილი დამოკიდებულებით არ მგონია, მსოფლიო საფოსტო კავშირში ხდებოდეს გაწევრიანება“.
გარდა ამ შემთხვევისა, ინტერნეტსივრცეში ხშირად შეხვდებით მსგავსი შინაარსის პოსტებს:
„www.asos.com-დან გამოვიწერე ამანათი, რომელიც არ ჩამოვიდა, ახლა მწერენ, თქვენს ადგილობრივ ფოსტას ჩავაბარეთო, ფოსტაში ვრეკავ, არავინ არაფერი არ იცის და მე მივქარე რამე თუ ეს ჩვეულებრივი მოვლენაა?“
„ამერიკიდან საქართველოს ფოსტაზე ჩემი დის გამოგზავნილი ამანათები ხშირად იკარგება. წერილები უფრო არ იკარგება, იმ შემთხვევების გარდა, თუ წერილში ფული დევს. იყო შემთხვევები, როდესაც ჩემს დას წერილში 500 დოლარი ჩაუდია და საქართველოში მხოლოდ 300 დოლარი ჩამოსულა. ეგ კი არა, ერთხელ გახსნილი ჩანთა გამომატანეს და საერთოდ საქართველოში რაღაა გასაკვირი?“
როგორც ჩანს, ამ ფაქტებმა სამართალდამცველებამდეც მიაღწია… „პრაიმტაიმისთვის“ ცნობილი გახდა, რომ რამდენიმე დღის წინ შინაგან საქმეთა სამინისტრომ საქართველოს ფოსტის თანამშრომელი დააკავა, რომელიც სწორედ ამანათების ქურდობაში ამხილეს. პოლიციას შესაბამისი მოკვლევის ჩატარების მიზნით თავად „საქართველოს ფოსტამ“ მიმართა, ეს მას შემდეგ, რაც უკმაყოფილო მომხმარებლები ძირითადად ერთსა და იმავე სურათს აღწერდნენ. ფოსტის თანამშრომლის დაკავების შესახებ ინფორმაციას შსს-ში ადასტურებენ და განმარტავენ:
„შინაგან საქმეთა სამინისტროს თბილისის პოლიციის დეპარტამენტის დეტექტივების სამმართველოს მე-3 განყოფილების თანამშრომლებმა, ჩატარებული ოპერატიულ-სამძებრო და საგამოძიებო ღონისძიებების შედეგად, საქართველოს ფოსტის საერთაშორისო საფოსტო გზავნილების გაცვლის ცენტრის დახარისხების ოპერატორი – 1989 წელს დაბადებული ი.ს. ქურდობის ბრალდებით დააკავეს. მის მიერ ჩადენილი დანაშაული 4-დან 7 წლამდე ვადით თავისუფლების აღკვეთას ითვალისწინებს“.
გამოძიებით დადგინდა, რომ ბრალდებული სამსახურებრივი მოვალეობის შესრულებისას ფარულად, არაერთხელ დაეუფლა მოქალაქეების კუთვნილ ამანათებსა და მცირე პაკეტებს. პოლიციამ დაკავებულის საცხოვრებელი სახლისა და მისი მართვის ქვეშ არსებული ავტომანქანის ჩხრეკისას, ნაქურდალი ნივთები ნივთმტკიცებად ამოიღო. ამოღებულ მტკიცებულებებს შორისაა საათები, მობილური ტელეფონები და სხვა სახის ნივთები. გამოძიება ქურდობის ფაქტზე მიმდინარეობს, საქართველოს სსკ-ს 177-ე მუხლის მე-3 ნაწილის „ა“ ქვეპუნქტით.
წყარო: გაზეთი „პრაიმტაიმი“