პოლიციის პოლკოვნიკი და მსახიობი დავით როსტომაშვილი დღემდე შს სამინისტროს დაცვის სამმართველოში ერთ-ერთი დეპარტამენტის მაღალჩინოსანია. მისი პოლიციური სტაჟი ჯერ კიდევ ედუარდ შევარდანაძის ხელისუფლების დროიდან იწყება. გარდა ამისა, იგი “ნაციონალური მოძრაობის” ხელისუფლების დროს სასჯელაღსრულებისა და პრობაციის სამინისტროს თანამშრომელი იყო. ამჟამად, პოლიციის პოლკოვნიკის თავდასხმის საქმეზე საქალაქო სასამართლოში პროცესი მიმდინარეობს. აქ დავით როსტომაშვილი დაზარალებულია. საბრალდებო სკამზე 3 ბრალდებული ზის. მათ შორის ორი, ბექა კირვალიძე და ზურაბ ქუთელია, პოლიციის მაღალჩინოსნის შვილის გიორგი როსტომაშვილის მეგობრები არიან. ამასთან, ბექა კირვალიძე ძარცვის ბრალდებით ადრე ნასამართლევია. ბექა კირვალიძე საპატიმროში 2011 წელს აღმოჩნდა, მან ციხის საკანი 2012 წლის, ხელისუფლების ცვლილების შემდეგ დატოვა და ვადაზე ადრე გათავისუფლდა.
თბილისის საქალაქო სასამართლოში პროცესი ორშაბათს, 19 თებერვალს განახლდება. თუმცა, სასამართლო განხილვა დახურულ კარს მიღმა გაგრძელდება. სასამართლოში განმარტავენ, რომ წესრიგის დაცვის მიზნით, სასამართლო პროცესი დახურულ რეჟიმში მიმდინარეობს.
ფაქტი: 2017 წლის 14 ივნისს, ბერი გაბრიელ სალოსის ქუჩაზე დავით როსტომაშვილს თავს დაესხნენ. თავდამსხმელმა პოლიციის პოლკოვნიკს თავში ბეისბოლის ბიტა ჩაარტყა. მომხდარი ფაქტიდან 20 წუთში, სამართალდამცველებმა ბექა კირვალიძე დააკავეს. მოგვიანებით ზურა ქუთელია, ხოლო დანაშაულიდან ერთი თვის შემდეგ, _ არტემ აგაჯანოვი.
ცნობისათვის, ბრალდებულები ბექა კირვალიძე, არტემ აგაჯანოვი, ზურაბ ქუთელია და დაზარალებული დავით როსტომაშვილი ისნის რაიონში, სხვადასხვა მისამართზე ცხოვრობენ.
ამბავი: „ 2011 წელს, ბექა ჯერ კიდევ 18 წლის იყო, როდესაც ვიღაცასთან იჩხუბა და დააკავეს. მას ყაჩაღობის ბრალდება წაუყენეს. 7 -წლიან სასჯელზე უშვებდნენ, მაგრამ მაშინ პროკურორის შემოთავაზებას დავთანხმდით და ყაჩაღობა ძარცვის ბრალდებით შეცვალეს. 6000 -ლარიანი საპროცესო შეთანხმება გავაფორმეთ. 7 წლიანი სასჯელი 4 წლით შეიცვალა. სასჯელს გლდანის დაწესებულებაში იხდიდა. ალბათ გახსოვთ რა ხდებოდა ამ საპატიმროში. როდესაც შვილთან პაემანზე დავდიოდი, ვუყურებდი ჩემს შვილს, მაგრამ ის სხვა ადამიანი იყო. ვხედავდი, თითები და სახე როგორ უკანკალებდა, თავზე ნაიარევი ჰქონდა. თუმცა, არაფერს გვეუბნებოდა. ციხიდან დანევროზებული გამოვიდა. ვგრძნობდი, ჩემი შვილი გულით დარდს ატარებდა. რამდენჯერმე ვკითხე, მაგრამ არაფერს მეუბნებოდა. ერთხელ წამოსცდა, ვინც მე ციხეში ცუდად მექცეოდა, გზად თუ გადავეყარე, სამაგიეროს გადავუხდიო. ბიჭის დედა ვარ, ვგრძნობდი, ჩემი შვილის თავმოყვარეობაზე ვიღაცამ ძალიან იმოქმედა. ცხოვრება ჩვეულ რიტმში მიდიოდა. ერთხელ ბექამ მეგობარი მოიყვანა სახლში, ბებიასთან. გიორგი ერქვა. „ დათო როსტომაშვილის შვილიაო“ – მითხრა ბექამ. ბექა და გიორგი როსტომაშვილი მეგობრები იყვნენ, გიორგი ხშირად დადიოდა ჩვენთან. ბექას და გიორგის კიდევ ერთი მეგობარი ჰყავთ, ზურაბ ქუთელია. ერთხელ გიორგიმ ბექა სახლში მიიპატიჟა. როგორც მოგვიანებით გავიგე, ჩემმა შვილმა მისი მეგობრის მამა თვალებით იცნო. ეს ის კაცი იყო, რომელიც ჩემს შვილს ციხეში ცუდად ექცეოდა. დავით როსტომაშვილზე თავდასხმის დროს, ჩემი შვილი მარტო იყო. ამ ფაქტს უამრავი თვითმხილველი ჰყავს. ეს იყო შურისძიება და არა ყაჩაღობა. მსახიობი დავით როსტომაშვილი ჩემ შვილს ციხეში სცემდა და მას სწორედ ამიტომ გაუსწორდა ფიზიკურად. ჩემს შვილს გეფიცებით, ზურა ქუთელია სულ ტყუილად ზის ციხეში. მისი ვინაობა, თავად დავით როსტომაშვილმა თავდასხმიდან 8-9 საათის შემდეგ, პოლიციას შეატყობინა. რატომღაც მერე გაახსენდა, საკუთარი შვილის კიდევ ერთი მეგობარი და ზურაც დააჭერინა“, – აცხადებს „კვირასთან“ საუბრისას ბრალდებულ ბექა კირვალიძის დედა ლია კირვალიძე.
ბექა კირვალიძის ადვოკატის ლოტბერტი კუპატაძის ინფორმაციით, მისი დაცვის ქვეშ მყოფი თავდასხმას აღიარებს, თუმცა ყაჩაღობას არა.
„ბრალდებული ბექა კირვალიძე ამბობს, რომ იგი დავით როსტომაშვილს თავს დაესხა და აღიარებს, მოტივი შურისძიება გახლდათ. როგორც ჩემი დაცვის ქვეშ მყოფი პირი ამბობს, მას დავით როსტომაშვილი საპატიმროში ცუდად ექცეოდა და იცნო. რაც შეეხება ყაჩაღობის ბრალდებას, ამ ბრალდებას არ აღიარებს. გარდა ამისა, საქმეში არ დევს ნივთმტკიცება ოქროს ყელსაბამი, რომელიც თითქოს პოლიციის პოლკოვნიკს თავდასხმის დროს ეკეთა. დაზარალებული ამბობს, რომ ამ ყელსაბამის ღირებულება 7000 ლარს შეადგენდა. არავინ იცის ეკეთა თუ არა მას ეს ოქროს ყელსაბამი. რადგან საქმის მასალებში ნივთმტკიცება არ დევს. არ არის ამოღებული ეს ყელსაბამი. “ – ამბობს „კვირასთან“ საუბრისას ბექა კირვალიძის ადვოკატი.
ამ საკითხის გარკვევას „კვირა“ თავად პოლოციის პოლკოვნიკთან შეეცადა. თავდაპირველად, მან კონცერტი მოიმიზეზა და ტელეფონი გათიშა. უფრო მეტიც, საკონტაქტო ნომერი „დაბლოკა“. თუმცა, 24-საათიანი მცდელობის შემდეგ, მცირე კომენტარით შემოიფარგლა. კითხვაზე რა კომენტარს გააკეთებთ, ბექა კირვალიძის დედის ბრალდებასთან დაკავშირებით, რომელიც აცხადებს, რომ დავით როსტომაშვილი ციხეში პატიმრებს სცემდა, მისი შვილი კი ამის გამო გაუსწორდა, როსტომაშვილი კონკრეტული პასუხისგან თავს იკავებს. „ „სასამართლოზე ვუპასუხებ ყველას და ყველა ბრალდებას“, –აღნიშნა მან.
მისი თქმით, სწორედ ამის შემდეგ, მოსამართლემ პროცესი დახურა და დღემდე დახურულ რეჟიმში მიმდინარეობს. გუშინდელ პროცესზე პოლიციის პოლკოვნიკის შვილი დაიკითხა, რომელიც თავდასხმის დროს მამასთან ერთად იმყოფებოდა.
ვინ არის პოლიციის მაღალჩინოსნის და მსახიობის შვილი გიორგი როსტომაშვილი ?!
