იტალიასა და გერმანიაში ქურდობის ბრალდებით და ქურდობის მცდელობის ფაქტზე ქართველები დააკავეს. ინფორმაციას 1tv ავრცელებს.
41 წლის კაცი ქალაქ მატერაში ერთ-ერთი კერძო სახლის გაქურდვის ფაქტზე დააკავეს. გამოძიების ცნობით, ბოროტმოქმედმა თანამზრახველთან ერთად შეაღწია სახლში და ძვირფასეულობა მოიპარა. ქურდობაში ბრალდებულების პოვნა პოლიციამ მანქანის სანომრე ნიშნის საშუალებით შეძლო. დაკავების დროს სამართალდამცავებმა მოპარული ნივთები ამოიღეს და პატრონს დაუბრუნეს. დაკავებული ციხეშია გადაყვანილი.
რაც შეეხება გერმანიაში დაკავებულ 33 და 35 წლის ქართველებს, ისინი პოლიციამ ქალაქ კემნიცში მაშინ დააკავეს, როდესაც ბინის გაქურდვის შემდეგ მიმალვას ცდილობდნენ. სამართალდამცველების ცნობით, დაკავებულებს სახლიდან მოპარული ნივთები აღმოაჩნდათ. პოლიციაში არ გამორიცხავენ, რომ დაპატიმრებულებს თანამზრახველებიც ჰყავდათ. გამოძიება ცდილობს დაადგინოს, არიან თუ არა დამნაშავეები ქართველი მძარცველების ჯგუფის წევრები.
19 თებერვალს პარლამენტში საგარეო საქმეთა მინისტრს მიხეილ ჯანელიძეს და იუსტიციის მინისტრს თეა წულუკიანს მოუსმინეს. კომიტეტების სხდომებზე მსჯელობისას აქტუალური საკითხი იყო ქართველების მიერ ევროკავშირში ვიზალიბერალიზაციით გათვალისწინებული წესების დარღვევა და ქართველების მიერ ჩადენილი კრიმინალური ქმედებები.
საქართველოსთვის ვიზალიბერალიზაციის შეჩერების მექანიზმის შესაძლო ამოქმედებასთან დაკავშირებული პრობლემა დღის წესრიგში ევროკომისიის დასკვნის შემდეგ დადგა.
ვიზალიბერალიზაციის ამოქმედებიდან 10 თვის შემდეგ საქართველომ პირველი გაფრთხილება მიიღო. მთავარ გამოწვევად თავშესაფრის მაძიებელთა რაოდენობის ზრდა დასახელდა.
2016 წელს თავშესაფრის მისაღებად განაცხადი 625-მა მოქალაქემ შეავსო, 2017 წელს კი მსურველთა რაოდენობა – 1570-მდე გაიზარდა. ქართველებისთვის ყველაზე სასურველ ქვეყნებს შორის შვედეთი და ისლანდია მოხვდა.
პრობლემად ისევ დასახელდა ორგანიზებულ დანაშაულში ქართველების მონაწილეობა. ქურდობა და ყაჩაღობა განსაკუთრებით ხშირია: საფრანგეთში, გერმანიაში, იტალიაში, საბერძნეთსა და ესპანეთში. ამ ფონზე საქართველოს მთავრობა სანქციების გამკაცრებაზე დაფიქრდა. მთავრობის წევრები მოქალაქეებს ამ მონაპოვარის გაფრთხილებისკენ მოუწოდებენ.