პაატა ბურჭულაძის ჯერ პოლიტიკიდან, შემდეგ კი ქვეყნიდან გაქცევის შემდეგ პარტიაში პოზიციები ნიკა მაჭუტაძემ გაიმაგრა. რებრენდინგი პარტიამ ვერ შეძლო – მაჭუტაძემ ვერც რეფორმები გაატარა და ვერც რაიმე აზრი ან ხიბლი შესძინა ულიდეროდ დარჩენილ პარტიას. ერთადერთი, რაც მოხდა, პარტიას თავსართი „პაატა ბურჭულაძე“ ჩამოშორდა და სათაური ახლა ასე ჟღერს: „მოძრაობა „სახელმწიფო ხალხისთვის“.
თუმცა, ახლა ჩვენ პოლიტიკაზე საუბარი არ გვსურს. ამ შემთხვევაში მაჭუტაძე შესაძლოა, სასამართლო დარბაზში აღმოჩნდეს. „პრაიმტაიმის“ ინფორმაციით, პოლიტიკოსს შსს-ში უჩივიან.
საქმე ის გახლავთ, რომ ბატონი მაჭუტაძე თავის მეგობარ ქალს პირადი ცხოვრების ამსახველი ვიდეოს გასაჯაროებით აშანტაჟებდა. ქალბატონმა სამართალდამცავ ორგანოებს მიმართა. პოლიტიკოსის წინააღმდეგ საქმე უკვე აღიძრა. რამდენადაც ჩვენთვის არის ცნობილი, კონფლიქტი პოლიტიკოსის მხრიდან ეჭვიანობას მოჰყვა. მან მეგობარს, სავარაუდოდ, ჩხუბის დროს მობილური წაართვა და პირადი ცხოვრების ამსახველი ვიდეოთი აშანტაჟებდა.
ქალმა ვერც მობილური დაიბრუნა და ვერც შანტაჟიდან მოახერხა თავის დაღწევა, ამიტომაც ძალოვან უწყებებს მიმართა.
საქმეს შსს-ს ვაკე-საბურთალოს განყოფილება იძიებს. „პრაიმტაიმს“ შსს-ში მაჭუტაძის წინააღმდეგ მოქალაქის მიერ საჩივრის შეტანის ფაქტი დაუდასტურეს, სხვა დეტალები არ ხმაურდება.
საქმე სსკ-ის 157-ე მუხლის პირველი ნაწილით აღიძრა, რაც პირადი ცხოვრების ამსახველი ინფორმაციის უკანონოდ მოპოვებას გულისხმობს:
„პირადი ან ოჯახური საიდუმლოს უკანონოდ მოპოვება, შენახვა ან გავრცელება, – ისჯება ჯარიმით ანდა გამასწორებელი სამუშაოთი ვადით ერთ წლამდე ანდა თავისუფლების აღკვეთით იმავე ვადით“.
ჩვენი აზრით, სასჯელი საკმაოდ მსუბუქია. მით უფრო პოლიტიკოსისგან შანტაჟის ასეთ ფორმაზე გაცილებით მკაცრი რეაქცია უნდა იყოს საზოგადოების მხრიდანაც.
თავად ნიკა მაჭუტაძემ „პრაიმტაიმთან“ საუბარში განაცხადა, რომ მან არაფერი იცის.
– არაფერი ვიცი, არავინ დამკავშირებია, რაზეა საუბარი, არ ვიცი. თქვენ ხომ ქეთის ელაპარაკეთ და მანაც ხომ გითხრათ, რომ არაფერი არ იცის?
– დიახ, ველაპარაკეთ, ქეთიმ უარყო. თუმცა, შსს გვიდასტურებს ინფორმაციას. გვითხრეს, რომ მოქალაქისგან ნამდვილად შევიდა საჩივარი და საქმეც აღიძრა. ეგებ სხვასთან გქონდათ რაიმე ინციდენტი?
– არაფერი ვიცი, ეს არ არის სწორი ინფორმაცია.
– მოქალაქე ჩივის, რომ თქვენ მას პირადი ცხოვრების ამსახველი ვიდეოს გასაჯაროებით აშანტაჟებდით…
– რას ამბობთ? მე ვაშანტაჟებდი? სისულელეა ეს, სასაცილოა.