დავით ქაცარავა მიიჩნევს, რომ არჩილ ტატუნაშვილი საკონტროლო გასროლით მოკლეს

ნატახტარში, არჩილ ტატუნაშვილის ოჯახი აქციას მართავს. ოჯახის წევრების მთავარი მოთხოვნაა, რომ მომხდარის შესახებ ხელისუფლებამ რეაგირება მოახდინოს და ცხედრის გადმოსვენება დროულად მოხდეს.
მოძრაობის “ძალა ერთობაშია“ ლიდერი დავით ქაცარავა აცხადებს, რომ არჩილ ტატუნაშვილის ცხედარს საოკუპაციო რეჟიმი კიდევ რამდენიმე დღე არ გადასცემს.
მისივე თქმით, ტატუნაშვილები მთავარი მაგისტრალის გადაკეტვასა და პერმანენტული აქციების გამართვას აპირებენ.
“ოჯახმა დააანონსა გზის გადაკეტვა. იქნება საპროტესტო აქცია, სადაც გამოვა მთელი მოსახლეობა, დაიკეტება გზა ნატახტარის მიმდებარედ. ჩვენ, მოძრაობა “ძალა ერთობაშია“ ბუნებრივია, შევუერთდებით ამ აქციას,”-ამბობს ქაცარავა.
მოძრაობის ლიდერის თქმით, მათთვის მიწოდებული ინფორმაციის თანახმად, არჩილ ტატუნაშვილი საოკუპაციო რეჟიმის წევრებმა საკონტროლო გასროლით მოკლეს. დავით ქაცარავა მკვლელობის დამკვეთისა და შემსრულებლის ვინაობასაც ასახელებს.
“დამკვეთი გახლავთ ვინმე ფილიპ ხაჩიროვი, რომელიც გახლავთ ახალგორის გამგებელი, ხოლო შემსრულებელი მკვლელი გახლავთ ლუდვიგ ხაჩიროვი, რომელმაც საკონტროლო გასროლით მოკლა არჩილ ტატუნაშვილი,“ – აცხადებს დავით ქაცარავა.