ცივი იარაღის გაყიდვა მხოლოდ კონკრეტულ ადგილებში იქნება შესაძლებელი, მისი შეძენა კი განსაზღვრული კატეგორიის მოქალაქეებს შეეძლებათ. ამის შესახებ შს მინისტრის მოადგილემ ნათია მეზვრიშვილმა თქვა. ინფორმაციას სააგენტო “ინტერპრესნიუსი” ავრცელებს.
მეზვრიშვილის თქმით, შესაბამისი საკანონმდებლო ცვლილებები უწყებას მზად აქვს და პროექტი მთავრობას, სავარაუდოდ, შემდეგ კვირაში წარედგინება.
“დღეს ცივი იარაღის ყიდვა-გაყიდვა არ არის რეგულირებადი და ჩვენ გვინდა, რომ ეს რეგულაციებში მოვაქცვიოთ. გვინდა დავაწესოთ შეზღუდვები, მათ შორის კანონმა განსაზღვროს, ვის არ შეიძლება მივყიდოთ ცივი იარაღი. მაგალითად, არასრულწლოვნებს, ნასამართლევ პირებს და ა.შ. გვინდა გამოვყოთ ე.წ. რისკ ჯგუფები, რომლებისთვისაც არ შეიძლება ცივი იარაღის მიყიდვა, გავამკაცროთ არსებული კანონმდებლობა და გარდა ამისა, დავხვეწოთ აღსრულების მექანიზმები. სწორედ ამ ოთხი მიმართულებით ვმუშაობთ ახლა, რაც საბოლოო ჯამში, მიზნად ისახავს, რომ ცივი იარაღის აბსოლუტურად უკონტოლო ბრუნვის პრობლემა მოგვარდეს, რათა ეს იარაღი არ მოხვდეს არასრულწლოვნების, ან სხვა რისკ-ჯგუფების ხელში, რასაც მერე, საბოლოო ჯამში, მივყავართ დაჭრამდე და დანაშაულის ჩადენამდე.
ასევე ვფიქრობთ, განისაზღვროს კონკრეტული ადგილები, სადაც ცივი იარაღი გაიყიდება და არა ყველგან, სადაც არასრულწლოვნისთვის მარტივად ხელმისაწვდომი იქნება ეს იარაღი, სადღაც მაგალითად, მიწისქვეშა გადასასვლელში, სადაც დახლზე აწყვია, ვიღაც მიდის და ამას 5 ლარად ყიდულობს“, – განაცხადა ნათია მეზვრიშვილმა.