უნდა გვესმოდეს, რომ პოლიციელის საქმე არის ძალიან პატივსაცემი და ასეთ ადამიანებზე ხელის აღმართვა უფრო მკაცრად უნდა ისჯებოდეს. ამის შესახებ იუსტიციის მინისტრმა თეა წულუკიანმა „ადმინისტრაციულ სამართალდარღვევათა კოდექსში“ ცვლილებებთან დაკავშირებით განაცხადა, რომელიც პოლიციელის შეურაცხყოფისთვის ჯარიმის გაზრდას ითვალისწინებს.
„ვფიქრობ, რომ შინაგან საქმეთა სამინისტროს ეს ინიციატივა არამცთუ დროულია, არამედ ყველას ერთად უფრო ადრეც უნდა განგვეხორციელებინა. ამიტომაც, ჩვენ ერთხმად დავუჭირეთ ამ ინიციატივას მხარი მთავრობის სხდომაზე. იმედი გვაქვს, რომ პარლამენტში ეს მიდგომები გაზიარებული იქნება, რადგანაც ჩვენ საქართველოს მოქალაქეებს ყველას უნდა გვესმოდეს, რომ პოლიციელი იცავს ჩვენს უსაფრთხოებას, რომ პოლიციელის საქმე არის ძალიან პატივსაცემი საქმე“, – განაცხადა იუსტიციის მინისტრმა.
მისი თქმით, ეს არის სირთულეებით სავსე სამსახური, რომელსაც პოლიციელები საკმაოდ მწირი ხელფასის პირობებში ასრულებენ.
„არ უნდა დაგვავიწყდეს, რომ მათაც ჰყავთ ოჯახები და მიუხედავად ამისა, ხშირად გვიან ღამით, მაშინ როდესაც ჩვენ გვძინავს, ჩვენს უსაფრთხოებას იცავენ. აქედან გამომდინარე, ასეთ ადამიანებზე ხელის აღმართვა, მე ვფიქრობ დიახ უნდა ისჯებოდეს უფრო მკაცრად, ვიდრე დღეს ისჯება“, – განაცხადა თეა წულუკიანმა.