–ირაკლი შავაძემ კითხვებზე პასუხის გაცემა არ ისურვა და დატოვა შეხვედრა დროზე ადრე, – ამის შესახებ ჟურნალისტებს იუსტიციის უმაღლესი საბჭოს მდივანმა გიორგი მიქაუტაძემ საბჭოში, ბათუმის საქალაქო სასამართლოს მოსამართლე ირაკლი შავაძესა და ამავე სასამართლოს თავმჯდომარე, დავით მამისეიშვილთან შეხვედრის შემდეგ განუცხადა. მისი თქმით, საბჭო დღეს მიღებულ ინფორმაციას შეაფასებს.
“იუსტიციის უმაღლესი საბჭოს წევრები შევხვდით ირაკლი შავაძეს და დავით მამისეიშვილს იმ განცხადებებთან დაკავშირებით, რომელიც მასმედიის საშუალებით მოვისმინეთ, რათა პირველწყაროდან მიგვეღო ინფორმაცია. ირაკლი შავაძემ კითხვებზე პასუხის გაცემა არ ისურვა და დატოვა შეხვედრა დროზე ადრე. დავით მამისეიშვილმა კი უპასუხა საბჭოს წევრების შეკითხვებს. ამის შემდეგ საბჭო შეაფასებს იმ ინფორმაციას, რომელიც მიიღო ამ საუბრების პროცესში. თუ საჭირო იქნება, შეაგროვებს მტკიცებულებებს და მიიღებს გადაწყვეტილებას. გაჟღერდა რამდენიმე ისეთი ინფორმაცია, რომელიც იუსტიციის უმაღლესმა საბჭომ უნდა გადაამოწმოს მტკიცებულებებზე დაყრდნობით. ბატონ შავაძეს რაიმე სახის მტკიცებულება არ წარმოუდგენია, მხოლოდ ზეპირი კომუნიკაცია გვქონდა. საჭიროა, რომ იუსტიციის საბჭომ მტკიცებულებების მეშვეობით გადაამოწმოს ეს ინფორმაცია და შემდგომ იმსჯელოს, თუ რა რეაგირება შეიძლება მოჰყვეს”,– განაცხადა მიქაუტაძემ.