გიორგი კვირიკაშვილი – ავტოკეფალიის აღდგენით ისტორიული სამართლიანობა აღდგა, ჩვენ დავიბრუნეთ ჩვენი დედაეკლესია

ავტოკეფალიის აღდგენით ისტორიული სამართლიანობა აღდგა, ჩვენ დავიბრუნეთ ჩვენი დედაეკლესია, – ამის შესახებ ნათქვამია საქართველოს პრემიერ-მინისტრ გიორგი კვირიკაშვილის განცხადებაში ავტოკეფალიის აღდგენის დღესთან დაკავშირებით.
„დღეს საქართველოს მართლმადიდებელი სამოციქულო ეკლესია ავტოკეფალიის აღდგენის დღეს აღნიშნავს. 1917 წელს ავტოკეფალიის აღდგენით ისტორიული სამართლიანობა აღდგა, ჩვენ დავიბრუნეთ ჩვენი დედაეკლესია. საუკუნეების განმავლობაში სწორედ მის წიაღში ინახავდნენ სარწმუნოებას ჩვენი წინაპრები და სულიერი მამები, უფრთხილდებოდნენ იმ ღირებულებებს, რომლებზეც დგას ჩვენი ერი და ქვეყანა. ავტოკეფალიის აღდგენამ უდიდესი გარდატეხა მოახდინა ჩვენი ერის ცხოვრებაში, რასაც სულ მალე საქართველოს დემოკრატიული რესპუბლიკის გამოცხადება მოჰყვა… 2018 წელი საიუბილეოა – საქართველო დემოკრატიული რესპუბლიკის გამოცხადების 100 წელს ზეიმობს“, – ნათქვამია განცხადებაში.
საქართველოს სამოციქულო მართლმადიდებელი ეკლესია დღეს ავტოკეფალიის აღდგენას დღესასწაულობს.