28 მარტს, 17:00 საათზე, სასტუმრო ციტადინში (თავისუფლების მოედანი #4) ჩატარდება სამუშაო შეხვედრა, რომლის მთავარი მიზანია აგარის შაქრის ქარხანასთან დაკავშირებულ პრობლემებზე მსჯელობა. შეხვედრა ახალგაზრდა ფინანსისტთა და ბიზნესმენთა ასოციაციის (აფბა) ინიციატივით ტარდება. დისკუსიაში მონაწილეობის მისაღებად მოწვეულები არიან აგარის შაქრის კომპანიის ყოფილი თანამშრომლები, აგარის შაქრის კომპანიის ადმინისტრაცია, დარგობრივი პროფკავშირები და ბიზნესომბუდსმენი ირაკლი ლექვინაძე. ასევე, მოწვეულნი არიან ეკონომიკის სამინისტროს წარმომადგენლებიც.
“უკვე რამდენიმე თვეა, აგარის შაქრის ქარხანა კონსერვაციაზეა. ქარხნიდან გათავისუფლებულმა თანამშრომლებმა მიიღეს კანონით გათვალისწინებული კომპენსაცია. თუმცა, ბოლო რამდენიმე დღის განმავლობაში, ისინი ქუჩის აქციების ფორმატით აჟღერებენ გარკვეულ მოთხოვნებს, მათ შორის, ითხოვენ აგარის ქარხნის ხელახლა ამუშავებას.
აგარის შაქრის კომპანია აცხადებს, რომ მათი მთავარი მიზანი ქარხნის ამუშავებაა, თუმცა, მათი თქმით, არსებობს გარკვეული სირთულეები. სწორედ არსებული სირთულეების მოსაგვარებლად და გამოსავლის მოსაძებნად, აფბა-ს ინიციატივით შეიქმნა სამუშაო ჯგუფი. ახალგაზრდა ფინანსისტთა და ბიზნესმენთა ასოციაციამ პროცესში ჩართო ეკონომიკის სამინისტროს წარმომადგენლები და ბიზნესომბუდსმენის აპარატი. შეხვედრა მედიისათვისაც ღიაა”,- ნათქვამია განცხადებაში.