“ბრალდების მხარე აპელირებდა იმაზე, რომ მხოლოდ ჯაბა ხულორდავას ჩვენების საფუძველზეა დაკავებული ქორიძე, რაც არ შეესაბამება სიმართლეს, რაც დადასტურებულია კიდეც საქმეში წარმოდგენილი მასალებით”,- ამის შესახებ პროკურორმა ირინა ჩოჩიამ ჟურნალისტებს ირაკლი ქორიძის სასამართლო სხდომის დასრულების შემდეგ განუცხადა.
როგორც ჩოჩიამ აღნიშნა, ქორიძის წინააღმდეგ ათეულობით მოწმის ჩვენება არსებობს, რაც საქმის მასალებშიც დევს. “მხოლოდ მოწმეთა ჩვენებებით არ დასტურდება ირაკლი ქორიძის მიმართ წარდგენილი ბრალდება, ეს არის სხვადასხვა წერილობითი მტკიცებულებები, ეს არის გამოთხოვილი ინფორმაციები, რაც, ერთობლიობაში, ადასტურებს ქორიძისთვის ბრალად წარდგენილ ქმედებას. მოწმეთა ჩვენებებით დასტურდება, რომ ქორიძემ გაუწია ორგანიზება ამ დანაშაულს. მოწმეების ჩვენებებს ვერ მოვყვები და საქმის არსებით განხილვაში ვერ შევალ, გამომდინარე იქიდან, რომ ეს არ არის სასამართლოს ის ეტაპი, როდესაც ბრალდების მხარე ამას ახდენს. დაველოდოთ წინასასამართლო სხდომას”, – განაცხდა ირინა ჩოჩიამ.
შეგახსნებთ, რომ მოსამართლემ პროკურატურის შუამდგომლობა დააკმაყოფილა და ორგანიზებული ჯგუფის მიერ დიდი ოდენობით ნარკოტიკული საშუალებების საქართველოში შემოტანისა და შენახვისთვის ბრალდებულ ირაკლი ქორიძეს წინასწარი პატიმრობა შეეფარდა.