ყაჩაღობა გურიაში – ოზურგეთის მუნიციპალიტეტში ლიბერთი ბანკის მოლარე მაშინ დააყაჩაღეს, როცა ის პენსიას არიგებდა. შემთხვევა დღეს დილით, დაახლოებით, 10:00 საათზე მოხდა.
რამდენიმე ნიღბიანი პირი სოფლის ცენტრში განთავსებულ მომსახურების ცენტრში შეიჭრა. პენსიის გაცემა ამ დროს უკვე დაწყებული იყო.
მათ პენსიის რიგში მყოფ რამდენიმე მოხუცს სიტყვიერი და ფიზიკური შეურაცხყოფა მიაყენეს, ერთ-ერთ მათგანს ავტომანქანა წაართვეს და შემთხვევის ადგილი თანხასთან ერთად დატოვეს.
“ჩქარა ფულიო, მოლარეს თავზე დაადგნენ, აქეთ მეორე ქალს თავში ჩაარტყეს,“ – იხსენებენ თვითმხილველები ინციდენტს.
ავტომანქანა, რომლითაც სავარაუდო დამნაშავეები გაექცნენ, მოგვიანებით შემოქმედის ტყეში იპოვეს.
ექსპერტ-კრიმინალისტები ამ წუთებში სოფელ გორისფერდში მდებარე ტყეში მუშაობენ, სადაც, სავარაუდოდ, დამნაშავეები იმალებიან.