დღეს განსაკუთრებული დღეა, ექვსი წლის წინ, ზუსტად დღევანდელ დღეს, 2012 წლის 21 აპრილს ბატონი ბიძინა ივანიშვილის ხელმძღვანელობით დაარსდა ჩვენი პარტია „ქართული ოცნება – დემოკრატიული საქართველო“, – ამის შესახებ პარტიის თავმჯდომარემ, პრემიერ-მინისტრმა გიორგი კვირიკაშვილმა, ამბროლაურში, „ქართული ოცნება – დემოკრატიული საქართველოს“ რეგიონულ კონფერენციაზე განაცხადა.
მისი თქმით, პარტიამ უკომპრომისო ბრძოლა დაიწყო რეჟიმის წინააღმდეგ, რომელიც რამდენიმე თვეში დამაჯერებელი გამარჯვებით დასრულდა.
„საქართველოსთვის გადამწყვეტ ეტაპზე, ერთადერთი და ყველაზე ძლიერი იარაღით – მხოლოდ სიმართლით და ხალხის გვერდში დგომით, დაიწყო უკომპრომისო ბრძოლა რეჟიმის წინააღმდეგ, რომელიც სულ რამდენიმე თვეში, 1 ოქტომბერს, არჩევნებში დამაჯერებელი გამარჯვებით დაგვირგვინდა“, – განაცხადა გიორგი კვირიკაშვილმა.
მისი თქმით, აღნიშნულმა გამარჯვებამ გარდამტეხი როლი ითამაშა საქართველოს სახელმწიფოს დემოკრატიული განვითარების საქმეში.
„საბედნიეროდ, ჩვენ უკან მოვიტოვეთ ბევრი სირთულე და დღეს გვაქვს საშუალება, ახალ გამოწვევებს შევეჭიდოთ, აღვასრულოთ ჩვენი შორსმიმავალი გეგმები.
სწორედ ეს არის ჩვენი პარტიის დღევანდელი ამოცანა. დემოკრატიული მმართველობა ევროპული ქვეყნების ცხოვრების წესია და ჩვენც სწორედ ამ გზით მივდივართ“ – განაცხადა გიორგი კვირიკაშვილმა.