საერთაშორისო ორგანიზაციებში კორუფციის შემთხვევები ახალი არ არის, – ამის შესახებ ექსპერტმა კავკასიის საკითხებში მამუკა არეშიძემ განაცხადა.
მისი თქმით, მსგავსი ფაქტები, რასაც ევროსაბჭოს შემთხვევაში ჰქონდა ადგილი, იმიჯს ულახავენ ამ ორგანიზაციების მუშაობას.
„ამის მაგალითი იყო „ფრიდომ ჰაუსის“ დასკვნა, რომელიც ცოტა ხნის წინ გამოქვეყნდა და არსებობს ირიბი მონაცემები იმის თაობაზე, რომ ფულის ფაქტორთან გვქონდა საქმე. ეს ევროსაბჭოს მაგალითზეც გამოჩნდა, რომ კორუფციით იყო ეს ხალხი დაკავებული და თავს სჭრიდნენ საკუთარ კოლეგებს. დასავლელი პოლიტიკოსების მიერ საეჭვო მხარდაჭერები იმ პირების მიმართ, რომლებიც არც თუ კარგი რეპუტაციით სარგებლობენ ქართულ პოლიტიკაში, ამ ეჭვებს უფრო ამძაფრებს. ვფიქრობ, რომ მეტი სიფხიზლე გვმართებს ამ საკითხის მიმართ და კარგი იქნება, თუ ხელისუფლება ითანამშრომლებს და არსებულ ინფორმაციას გაუზიარებს იმ ორგანიზაციებს, ვინც ეს კორუფციული ფაქტები გამოააშკარავა”, – განაცხადა მამუკა არეშიძემ.
ევროსაბჭოს საპარლამენტო ასამბლეის რამდენიმე წევრს კორუფციაში დაადანაშაულეს. დამოუკიდებელი ექსპერტების ჯგუფის მიერ შედგენილ ანგარიშში ფიგურირებს რამდენიმე ევროპელი პოლიტიკოსი, რომელთაც ბაქოს ინტერესების ლობირებისთვის, ქრთამის აღებაში ადანაშაულებენ.
ამასთან, დოკუმენტში ნათქვამია, რომ ევროპის საბჭოს ყოფილი პრეზიდენტის მხრიდან აზერბაიჯანის ინტერესების ლობირება ნათლად იკვეთება.ანგარიშში ასევე ფიგურირებს იტალიელი პოლიტიკოსი ლუკა ვოლონტე. ევროპის სახალხო პარტიის ფრაქციის ყოფილი ლიდერის წინააღმდეგ გამოძიება 2016 წელს დაიწყო. მას აზერბაიჯანის ხელისუფლებისაგან ორი მილიონი დოლარის მიღებაში ადანაშაულებენ. ლუკა ვოლონტე, ევროსაბჭოს საპარლამენტო ასამბლეაში, ევროპის სახალხო პარტიის ფრაქციის თავმჯდომარე გახლდათ. ის რამდენჯერმეა ნამყოფი საქართველოში და 2013 წლის ნოემბერში საქართველოს პრეზიდენტისგან ღირსების ჯილდო აქვს მიღებული.