გაეროს გუნდი მიესალმება საქართველოში თამბაქოს კონტროლის კანონმდებლობის ამოქმედებას,- ამის შესახებ ორგანიზაციის მიერ გავრცელებულ განცხადებაშია ნათქვამი.
„2018 წლის პირველი მაისიდან ძალაში შედის შემდეგი რეგულაციები: – თამბაქოს კვამლისგან გათავისუფლების პოლიტიკა, რომლითაც იკრძალება მოწევა დახურულ საზოგადოებრივ და სამუშაო ადგილებში, აგრეთვე ზოგიერთ ღია ტერიტორიაზე და საზოგადოებრივ ტრანსპორტში; – თამბაქოს რეკლამის, პოპულარიზაციის და სპონსორობის აკრძალვა. გაეროს გუნდი მიესალმება საქართველოს პარლამენტის მიერ ერთი წლის წინ მიღებული ამ მნიშვნელოვანი რეგულაციის დანერგვას. პროცესში ჩართული ყველა მხარე დაინტერესებულია კანონი დაინერგოს, რათა ქვეყნის დღევანდელი და მომავალი თაობები დაცულ იყვნენ თამბაქოს მოხმარების კატასტროფული შედეგებისაგან. სამწუხაროდ, საქართველო ჯერ კიდევ იმ ქვეყნების რიგს განეკუთვნება, სადაც თამბაქოს მოხმარების მაჩვენებელი ძალიან მაღალია. თამბაქოს მოხმარება იწვევს თამბაქოზე დამოკიდებულებას და დიდ ზიანს აყენებს როგორც მწეველებს, ასევე მათი ოჯახის წევრებსა და სრულიად საზოგადოებას. საქართველოში მწეველია მამაკაცთა 57%, რაც მსოფლიოში ერთ-ერთი ყველაზე მაღალი მაჩვენებელია. მიუხედავად იმისა, რომ ქალებს შორის მწეველების ოფიციალური მაჩვენებელი ჯერ კიდევ შედარებით დაბალია (დაახლოებით 10%), ბოლო წლების განმავლობაში მწეველი ქალების რაოდენობა თითქმის გაორმაგდა საქართველოში. ყოველი მეოთხე სკოლის მოსწავლე მოიხმარს თამბაქოს რომელიმე პროდუქტს. მოსახლეობის 40%-ზე მეტი, მათ შორის ბავშვები და ორსულები, თამბაქოს კვამლის ზეგავლენის ქვეშ იმყოფება.”- წერია განცხადებაში.
გაერო აღნიშნავს, რომ ამბაქოსთან დაკავშირებული დაავადებების გამო, საქართველოში ყოველწლიურად დაახლოებით 11 000 ადამიანი იღუპება და მათ შორის 2 000-ზე მეტი არამწეველია, რაც საგანგაშო მაჩვენებლებია და ნათლად მიუთითებს თამბაქოს კონტროლის სფეროში მძლავრი და გადაუდებელი ქმედებების აუცილებლობაზე.