პრემიერმინისტრი ევროსაბჭოს იმ გადაწყვეტილებას გამოეხმაურა, რომელიც „ევროპის საბჭო და კონფლიქტი საქართველოში“ ფარგლებში გამოცხადდა.
კვირიკაშვილის თქმით, ეს არის საქართველოს სწორი საგარეო და შიდა პოლიტიკის დადასტურება, ასევე საქართველოს რეგიონების ოკუპაციისა და ადამიანების უფლებების კუთხით მდგომარეობის შეფასება.
“მოგეხსენებათ, რომ 2014 წლის შემდეგ აქტიურად განიხილება ევროსაბჭოს ფორმატში და სხვა საერთაშორისო ფორმატებში, რაც უმნიშვნელოვანესია საერთაშორისო საერთაშორისო საზოგადოების მხარდაჭერის კონსოლიდაციისთვის.
ევროსაბჭოში მიღებული გადაწყვეტილებები 2014 წლის შემდეგ წარმოადგენს ძალიან მკაფიო საერთაშორისო სამართლებრივ შეფასებას, რუსეთის როგორიც კონფლიქტის მხარის სამართლებრივ პასუხისმგებლობაზე და არსებულ ვითარებაზე ოკუპირებულ ტერიტორიებზე.
ევროსაბჭოს ქვეყნები ადასტურებენ რომ რუსეთის არც ერთი უკანონო აქტი, რომელიც მიზნად ისახავს საქართველოს რეგიონების სტატუსის შეცვლას არ არის სამართლებრივად მოქმედი და არც აქვს მას იურიდიული შედეგი. ასევე ისინი გამოხატავენ შეშფოთებას არჩილ ტატუნაშვილის და გიგა ოთხოზორიას სიცოცხლის ხელყოფაზე და ადამიანების უკანონო გატაცებასა და დაკავების სხვა ფაქტებზე. ასევე ევროსაბჭიო მიესალმა საქართველოს მტავრობის სამშვიდობო პაკეტს და ჩვენს ინიციატივებს ღია მხარდაჭერა გამოუცხადა. გადაწყვეტილებაში ხაზგასმულია, რომ საქართველოს მტავრობის ეს ინიციატივა წარმოადგენს ნათელ მაგალითს სამშვიდობო პოლიტიკის და ომით დაშორიშორებულ მოსახლეობას შორის ნდობის აღდგენის მტკიცე ნებაზე. ევროსაბჭოს ისევე როგორც საქართველოს სხვა პარტნიორების მხრიდან ჩვენი სამშვიდობო ინიციატივის აღიარება უმნიშვნელოვანესია შემდგომში მისი ეფექტური განხორციელებისთვის”,- განაცხადა გიორგი კვირიკაშვილმა.
2018 წლის 2 მაისს ევროპის საბჭოს მინისტრთა მოადგილეების კომიტეტის 1315-ე სხდომაზე, დღის წესრიგის საკითხის „ევროპის საბჭო და კონფლიქტი საქართველოში“ ფარგლებში, მორიგი გადაწყვეტილება მიიღეს, რომელშიც გამოიხატა ევროპის საბჭოს წევრი ქვეყნების მტკიცე მხარდაჭერა საქართველოს სუვერენიტეტისა და ტერიტორიული მთლიანობის მიმართ და ყურადღება გამახვილდა რუსეთის საერთაშორისო სამართლებრივ პასუხისგებლობაზე, როგორც ქვეყნისა, რომელიც ახორციელებს ფაქტობრივ კონტროლს საქართველოს ოკუპირებულ ტერიტორიებზე.