ქართულ-ამერიკული რესპუბლიკური ალიანსის“ საქართველოს წარმომადგენლობის (GARA) დირექტორმა ირაკლი შიხიაშვილმა მედიაჰოლდინგ „კვირას“ პრესკლუბში გამართულ პრესკონფერენციაზე განაცხადა, რომ გიორგი მარგველაშვილს პასუხისმგებლობა, რასაც მას პრეზიდენტის სტატუსი აკისრებს, გააზრებული არ აქვს.
„პრეზიდენტი უნდა იყოს კონსტიტუციის, სტაბილურობის დაცვის გარანტი, სამწუხაროდ, გუშინ ჩვენ დავინახეთ არაადეკვატური ადამიანი, ადამიანი რომელსაც არ ჰყოფნის ნერვები, მოისმინოს კრიტიკული მოსაზრებები, ნათლად არ აქვს წარმოდგენილი თავისი პასუხისმგებლობა. რაიმე სერიოზულ კრიზისულ ვითარებაში კიდევ რომ ჩავვარდეთ, სადაც პრეზიდენტის სიმტკიცის საჭიროება დადგებოდა, ამ ადამიანს ამისთვის არანაირი რესურსი არ აღმოაჩნდება. ასევე მინდა აღვნიშნო, რომ პარლამენტის წევრების გარკვეულ ნაწილს, რომლებიც სხდომაზე იმყოფებოდნენ, არ ეყოთ პოლიტიკური სიმწიფე იმისათვის, რომ ასეთი სამარცხვინო პროცესები არ განვითარებულიყო“, – განაცხადა ირაკლი შიხიაშვილმა.
შიხიაშვილი მიიჩნევს, რომ ის რაც 2 მაისს პარლამენტში მოხდა, ქვეყნის იმიჯისთვის დამაზიანებელია.
„გუშინ იყო დასკვნითი აკორდი, ამერიკის შეერთებული შტატები ჩვენი ქვეყნის უმთავრესი სტრატეგიული პარტნიორია და ეს კარგად უნდა გვესმოდეს, სამწუხაროდ, ხელისუფლების და ოპოზიციის წარმომადგენლებს ეს კარგად არ აქვთ გასიგრძეგანებული და არც ის საფრთხე აქვთ გააზრებული, რაც ჩვენი ქვეყნის მიმართ ჩრდილოეთიდან მოემართება. იმდენად ძლიერია დღეს რუსული პროპაგანდა ქვეყანაში, რომ საზოგადოების ნაწილი გადაბირებული ჰყავს უკვე და ამ პროცესს აგრძელებს. ინსტიტუტებს შორის, ასევე უმრავლესობის შიგნით დაპირისპირება უხარიათ ჩვენი ქვეყნის მტრებს და იმედგაცრუება უჩნდებათ ჩვენს მეგობრებს“, – აღნიშნა შიხიაშვილმა.